Janë mbajtur në hollin e Kuvendit të Shqipërisë homazhet për nder të ish-deputetit të Partisë Demokratike, Gerti Bogdani, të ndarë nga jeta një ditë më parë për shkak të një arresti kardiak.
Familjarë, miq e kolegë të 44-vjeçarit nderuan figurën e politikanit dhe i shprehën nugshëllimet familjes për humbjen e parakohshme të njeriut të tyre të dashur.
“Gerti vërtet sot udhëton drejt parajsës, por me atë bindjen e madhe që ai dinte dhe kishte ndërtuar parajsën e tij të vogël, në familjen e tij, në shoqërinë e tij”, tha për mediat nënkryetari i PD, Luçiano Boçi. “Pse jo edhe te imponimi që sillte në Kuvendin e Shqipërisë si zë i fortë, me imponimin që sillte me zërin e tij në politikën shqiptare dhe me zërin e tij si njeri, shembull i të rinjve që duhet të ndërtojnë një karrierë politike të ndershme dhe të përkushtuar siç e kishte Gerti Bogdani. Vërtet unë nuk e besoj ende, dhe të gjithë kolegët nuk e besojnë, ai do mbetet në kujtimet tona, ndoshta kujtimet nuk mjaftojnë dhe do donim që Gerti të ishte mes nesh, por ja që Zoti që bën shumë veprime të drejta, duket sikur sot na fut në atë meditimin se pse Gerti duhej të ikte kaq i ri dhe në kulmin e karrierës së tij politike dhe në kulmin e lumturisë së tij familjare. Por, fatet ndonjëherë janë të tilla dhe detyra jonë është që ta nderojmë, ta respektojmë, ta mbajmë gjithmonë gjallë kujtimin e tij. Lamtumirë Gert në emër të familjes sonë politike”.
Kush ishte Gerti Bogdani?
I lindur në Tiranë më 1980 dhe i diplomuar në Universitetin Politeknik të Nju-Jorkut, në Shtetet e Bashkuara të Amerikës, Bogdani nis angazhimin në politikë në vitin 2005.
Në vitin 2007, nis detyrën si Sekretar i Marrëdhënieve me Jashtë i PD, detyrë që mbajti deri në vitin 2019. Po në vitin 2007 kandidoi në Zgjedhjet Vendore, duke u zgjedhur kryetar i Minibashkisë numër 10 në kryeqytet.
Në vitin 2009, Gerti Bogdani, kandidoi në Zgjedhjet Parlamentare të 28 qershorit 2009 dhe zgjidhet deputeti më i ri në Kuvendin e Shqipërisë. Në vitin 2013 fiton një mandat të dytë si deputet i PD. Gjatë dy mandateve parlamentare shërben në komisionin e Integrimit Europian dhe në komisionin e Medias.
Bogdani ishte martuar me aktivisten Edlira Çepani dhe kishte dy fëmijë.
Reagimet pas ndarjes nga jeta të Gerti Bogdanit
Sali Berisha ka reaguar për ndarjen nga jeta në mënyrë të papritur të ish-deputetit demokrat, Gerti Bogdani si pasojë e infarktit. Berisha u shpreh se ky ishte një lajm shokues jo vetëm për të, por për të gjithë demokratët, ndërsa vlerësoi Bogdanin, shkruan A2 CNN.
“Lajm shokues, Gerti Bogdani ka qenë dhe do mbetet në memorien time. Njëri nga personalitetet e reja të PD-së më te njohura, më te shquara. Ai ka qenë një politikan, demokrat, me dinjitet me formim, me përgatitje, me ndershmëri në shkallën më të lartë. Kjo është një humbje e madhe për PD, por është një humbje e vërtetë për shoqërinë shqiptare. Gerti Bogdani ishte pasardhës i një familje të shquar, i shkolluar me rezultate më të larta, në shkollat më të mira në SHBA. Ai, midis një të ardhmeje në vendin që u shkollua dhe kontributit të vendit për PD, zgjodhi këtë të fundit. Ky lajm shokues, për mua dhe për çdo demokrat, më erdhi në këtë moment si rrufe në qiell të hapur. Dy net më parë e kam ndjekur në një studio televizive, mendoj se ka qenë një njeri që njoh unë, i cili te çdo qytetar dhe qytetare ka lënë vetëm përshtypje pozitive”, tha Berisha.
Presidenti i Partisë së Lirisë, Ilir Meta, ka reaguar pas lajmit të ndarjes nga jeta të ish-deputetit të Partisë Demokratike, Gerti Bogdani.
“Thellësisht i trishtuar nga lajmi për ndarjen e parakohshme nga jeta të ish-deputetit të Partisë Demokratike, Gert Bogdani”, tha Meta, shkruan A2 CNN. “Gjatë gjithë angazhimit të tij politik, ai krijoi një model pozitiv për të rinjtë duke i nxitur të jenë pjesë e vendimmarrjes”.
Ish-presidenti shprehu ngushëllimet për bashkëshorten Edlira dhe të afërmit e Bogdanit, për humbjen e njeriut të tyre të dashur. “I paharruar kujtimi i tij! Të prehet në paqe!”, tha Meta.
Kryeministri Edi Rama ka reaguar përmes një mesazhi për ndarjen nga jeta të ish-deputetit të Partisë Demokratike, Gerti Bogdani. “Keqardhje për ndarjen kaq të parakohshme nga jeta dhe ngushëllime bashkëshortes e familjes Bogdani”, shkruan Rama në një postim në Facebook.
Sipas burimeve të A2 CNN, Bogdani u nda nga jeta pasi pësoi infarkt. Edhe pse u transportua me urgjencë për në Qendrën Spitalore Nënë Tereza Spital, nuk ia doli.
Në një njoftim zyrtar, Policia e Tiranës tha se Bogdani u gjet pa ndjenja, rreth orës 11:30, në ambientet e një hoteli në bulevardin “Dëshmorët e Kombit”.
