Edhe këtë të enjte Parlamenti nuk njohu normalitet.
Aksioni i opozitës rezultoi në akuza reciproke mes mazhorancës dhe opozitës për kërcënim të sigurisë dhe jetës së deputetëve.
Fillimisht ishte demokratja Elda Hoti që spërkati në sallë dy shishe që tha se ishin me parfum, ndërsa mazhoranca pretendoi se bëhej fjalë për benzinë.
Momenti i dytë ishte jashtë në oborr, ku deputetë të opozitës akuzuan se Policia u ka drejtuar armët, ndërsa forcat e rendit deklaruan se efektivët e saj nuk ishin të armatosur.
Socialistët kishin zënë vendet prej kohësh në sallën e Kuvendit në momentin kur demokratët kaluan traun. Këtë herë nuk i priste kordoni i gardës por një gardh metalik.
Në përpjekje për t’u futur në parlament, deputetët opozitarë treguan edhe aftësi akrobatike.
Urdhri këtë herë ishte ndryshe: jashtë salle do të rrinin vetëm të përjashtuarit dhe 16 opozitarë që nuk janë në masën e sigurisë arritën të futeshin brenda. Qëllimi mbetej i njëjti, prishja e normalitetit parlamentar.
Një përpjekje e demokratëve për të vënë në sedër mazhorancën ngjalli kundërpërgjigjen e dy veteranëve të krahut të majtë.
Tensioni në sallë arriti pikun kur Elda Hoti, hapi dy shishe që tha se ishin me parfum dhe spërkati disa karrige. Me dyshimin se bëhej fjalë për lëndë djegëse, garda ndërhyri ta neutralizonte.
“Je e përjashtuar, ke vënë në rrezik deputetët. Prokuroria dhe SPAK duhet të hetojë. Garda të verifikojë çfarë lënde ishte”, u shpreh kryeparlamentarja Elisa Spiropali.
Ministri i Brendshëm njoftoi se do të bëhej padi për zjarrvënie të qëllimshme, ndërsa kryeparlamentarja deklaroi se kishte nuhatur benzinë në sallë.
Me daljen jashtë salle të deputetëve demokratë, socialistët kaluan shpejt rendin e ditës duke mbyllur punimet, por aksioni i opozitës vijoi.
Skenari i PD-së parashikonte transferimin e protestës periodike nga Bashkia e Tiranës te trau i parlamentit, gjë e cila shkaktoi tension.
Situata u duk se përshkallëzoi kur forcat e ndërhyrjes së shpejtë rrethuan deputetët e PD-së në oborrin e parlamentit.
Prania e tyre u konsiderua si provokim nga opozita, aq më shumë kur një punonjës i FNSH afron dorën në brez, duke krijuar idenë mes demokratëve se po nxirrte armën ndaj deputetit Luan Baçi dhe Bledion Nallbati.
Zinxhiri komandues i gardës e kuptoi se prania e Forcave të Ndërhyrjes së Shpejtë po sillte agravim të situatës, ndaj kërkuan largimin e policëve nga parlamenti.
Euforia e përplasjes përfshiu të gjithë opozitën, që deklaroi se ishte ndjerë e kërcënuar me jetë.
Policia më pas njoftoi se asnjë efektiv i saj nuk ka qenë i armatosur në protestë dhe shpërndau një video me shpjegimin se efektivi ka tentuar të kapë bombulën me spray piper që mbante në brez.
