Një ngjarje e tmerrshme ka ndodhur në Brazil, ku një nënë tentoi të shiste foshnjën e saj të porsalindur për të paguar kursin e gatimit. Policia braziliane njoftoi se gruaja dhe tre persona të tjerë janë arrestuar.
Incidenti ka ndodhur në qytetin Goiânia, rreth 900 kilometra larg São Paulos, shkruan A2.
Fqinjët e gruas njoftuan autoritetet për tentativën e shitjes dhe policia arriti të shpëtojë foshnjën, e cila po shitej për një shumë që nuk është bërë e ditur.
Gruaja, e cila dyshohet të ketë pasur depresion pas lindjes, ka lidhur marrëveshjen përmes të dashurit të saj, i cili nuk ishte babai i fëmijës. Ky i fundit, së bashku me një mik, kishin planifikuar shitjen e foshnjës për një biznesmene vendase që kërkonte një fëmijë, por nuk dihej se çfarë do të bëhej me fëmijën pas blerjes. Autoritetet zbuluan se biznesmenja ishte regjistruar për të birësuar një fëmijë në Regjistrin Kombëtar të Birësimeve, por nuk ishte përfshirë ende në listën e pritjes.
Shefi i policisë së Goias, Humberto Teófilo, tha se nëna kishte pranuar një shumë parash për të dorëzuar foshnjën, dhe që paratë do t’i përdorte për të paguar qiranë dhe për të ndjekur një kurs gatimi. Ai shtoi se nëna priste që pagesa të bëhej në ditët në vijim.
