Gjykata e Lartë e Shteteve të Bashkuara ka vendosur që administrata e Presidentit Donald Trump mund të vazhdojë të dëbojë emigrantët venezuelianë sipas një ligji të kohës së luftës të shekullit të 18-të.
Në një vendim, gjykata e lartë amerikane rrëzoi një urdhër nga një gjykatë federale më e ulët që kërkonte të bllokonte përkohësisht dëbimet sipas Aktit të Armiqve të huaj të vitit 1798. Administrata Trump ka përdorur ligjin, për të dëbuar anëtarët e dyshuar të bandës Tren de Aragua të Venezuelës.
Administrata deportoi qindra njerëz në El Salvador pasi Trump mori detyrën në janar, por fluturimet me emigrantët e dëbuar u ndaluan nga një gjykatës federal më 15 Mars. Ndërsa Gjykata e Lartë vendosi se administrata mund të përdorte ligjin e kohës së luftës për të kryer dëbimet, ajo tha se të dëbuarit kishin ende të drejtën për një proces të rregullt ligjor dhe një mundësi për të kundërshtuar largimin e tyre.
Si Trump ashtu edhe Unioni Amerikan i Lirive Civile e cilësuan vendimin nje fitore.
“Gjykata e Lartë ka mbështetur sundimin e ligjit në kombin tonë duke lejuar një President, cilido qoftë ai, të jetë në gjendje të sigurojë kufijtë tanë dhe të mbrojë familjet dhe vetë vendin tonë” , shkroi Trump në Truth Social.https://truthsocial.com/@realDonaldTrump/114299368234840539/embed
Të paktën 137 persona janë dëbuar nga administrata Trump, një veprim i dënuar gjerësisht nga grupet e të drejtave te njeriut. Akti i miratuar në 1798, i përdorur për herë të fundit në Luftën e Dytë Botërore, i jep presidentit amerikan kompetenca gjithëpërfshirëse për të urdhëruar ndalimin dhe dëbimin e vendasve ose qytetarëve të një kombi “armik” pa ndjekur proceset e zakonshme.
Banda Tren de Aragua adminsitrata amerikane e ka shpallur së fundmi një organizatë të huaj terroriste, e akuzuar për trafik seksual, kontrabandë droge dhe vrasje në qytetet kryesore të SHBA.
Zyrtarët amerikanë të emigracionit kanë thënë se të arrestuarit janë “verifikuar me kujdes” si anëtarë të bandës përpara se të dërgoheshin në El Salvador, sipas një marrëveshjeje.
