Turqia u godit me një tarifë bazë prej 10% në njoftimin për tarifat tregtare të presidentit amerikan Donald Trump javën e kaluar, krahasuar me tarifat më të larta për shumë vende të tjera, duke rritur perspektivën se ekonomia e 17-të më e madhe në botë mund të përfitojë nga regjimi i tarifave.
Ministri i Financave, Mehmet Simsek tha të hënën se fokusi i vendit në kërkesën e brendshme në vend të eksporteve do të nënkuptonte gjithashtu një ndikim më të kufizuar në ekonomi, shkruajnë mediat e huaja.
“Turqia ka marrëveshje të tregtisë së lirë me gjithsej 54 vende jashtë SHBA-së dhe BE-së”, tha ai, duke shtuar se “68% e eksporteve tona shkojnë në këto vende”.
Turqia ka një bashkim doganor me Bashkimin Evropian që heq kufizimet tregtare.
Duke folur të premten, një ditë pas njoftimit të Trump, Simsek theksoi se “norma relativisht e ulët e tarifave të Turqisë mund të sigurojë një avantazh krahasues në disa sektorë”.
Ndërsa Can Selcuki, partneri menaxhues i Istanbul Economics Research, mendon se efekti kryesor negativ mbi Turqinë ka të ngjarë të jetë nëpërmjet mallrave të ndërmjetme që ajo furnizon për vendet ose subjektet që eksportojnë në SHBA, të cilat janë subjekt i tarifave më të larta, si BE, e cila është subjekt i një tarife prej 20%.
Eksportet turke në SHBA ishin 16.7 miliardë dollarë (15.2 miliardë euro) në vitin 2024, sipas Zyrës së Përfaqësuesit të Tregtisë së SHBA.
Ajo importon një nivel të ngjashëm mallrash dhe shërbimesh nga Amerika.
Ky nivel zvogëlohet nga eksportet në BE, për të cilat presidenti Rexhep Tajip Erdogan tha në janar se arriti në 108.7 miliardë dollarë (99.2 miliardë euro) vitin e kaluar.
“Çdo humbje e fuqisë konkurruese të produkteve të BE-së në mënyrë të pashmangshme ndikon në Turqi sepse Turqia eksporton mallra të ndërmjetme për të hyrë në produktet përfundimtare të BE-së”, tha Selcuki. “Kjo është pjesa më e dukshme negative”.
Turqia, megjithatë, mund të shfrytëzojë mjedisin e ri të tregtisë globale në avantazhin e saj.
Sekib Avdagiç, president i Dhomës së Tregtisë së Stambollit, sugjeroi që kompanitë me bazë në vende me tarifa më të larta, si Kina, mund të kërkojnë të hapin fabrika në Turqi për të eksportuar në SHBA me një normë më të ulët.
E Gurkan Yildirim, kreu i Shoqatës së Biznesmenëve të Rinj Turk, shtoi se “nëse Turqia ofron një mjedis të përshtatshëm investimi, ajo mund të tërheqë investimet e këtyre kompanive”.
