Në ditën e parë të detyrës si ambasadore e superfuqisë botërore por edhe partnerit strategjik të vendit tonë, SHBA-së, Yuri Kim, shpreh angazhimin për të dhënë maksimumin në këtë mision.
“Jam e nderuar dhe e kënaqur që jam në Shqipëri dhe jam e gatshme t’i përvishem punës”, ka theksuar ajo.
Ambasadorja e re e SHBA-së mbërriti në Tiranë një ditë më parë, trembëdhjetë ditë pasi bëri betimin në Departamentin Amerikan të Shtetit.
Pasardhësja e Donald Lu, më herët ka shërbyer në Departamentin e Shtetit si Drejtore e Zyrës së Çështjeve të Evropës Jugore, ka punuar si drejtoreshë e Qendrës së Departamentit të Shtetit për Studimin e Diplomacisë, si dhe si drejtore e Zyrës për Sigurinë Evropiane dhe Çështjeve Politiko-Ushtarake.
Yuri Kim është gruaja e parë koreano-amerikane që përfaqëson SHBA në postin e një Ambasadori në Shqipëri.
Më herët, në seancën e konfirmimit në Komisionin për Punët e Jashtme në Senatin amerikan, e emëruara e Presidentit Donald Trump tha se në fokus të punës së saj në vendin tonë do të jetë zgjidhja e krizës politike dhe çuarja përpara e reformës në drejtësi./Ora News/