Shqipëria po përjeton një bum të paprecedentë turistik, i cili, sipas parashikimeve të qeverisë, mund të çojë në mbërritjen e deri në 30 milionë turistëve të huaj deri në vitin 2030. Kjo rritje marramendëse ka ngjallur panik në shumë zona të vendit, veçanërisht në bregdet, ku ndikimi i turizmit masiv është bërë gjithnjë e më i dukshëm dhe shpesh problematik. shkruan express.co.uk.
Pas një rritjeje të vazhdueshme nga viti në vit — nga 3 milionë turistë në 2015, në 6 milionë në 2019, dhe rreth 10 milionë në 2023 — Shqipëria është kthyer në një ndër destinacionet më të preferuara në Evropë. Me këtë ritëm, vendi është në rrugë për t’u mbipopulluar nga turistët, duke tejkaluar vende si Portugalia apo Kroacia në numra vjetorë vizitorësh.
Megjithatë, pas këtij suksesi fshihen shqetësime serioze për ndikimin në mjedis, urbanistikë dhe jetesën e qytetarëve. Në qytete bregdetare si Saranda dhe Dhërmiu, ndërtimet pa leje dhe hedhja e mbetjeve ndërtimore në det po dëmtojnë ekosistemet natyrore. Rritja e çmimeve të qirave dhe shërbimeve ka bërë që shumë banorë vendas të mos përballojnë më jetesën në qytetet e tyre.
“Duket sikur vendi po i nënshtrohet një rritjeje kaotike që nuk është as e planifikuar dhe as e kontrolluar,” thotë Uesli Didani nga portali lokal Saranda Web. “Nëse nuk merren masa të menjëhershme për të menaxhuar këtë fluks, pasojat do të jenë të pakthyeshme.”
Ndërkohë, miliarderë si Jared Kushner dhe Ivanka Trump po investojnë miliarda në ndërtimin e resorteve luksoze në zona të virgjëra si ishulli i Sazanit, duke e kthyer Shqipërinë në një terren të nxehtë për kapitalin ndërkombëtar — por me një kosto të madhe për komunitetet lokale.
A është Shqipëria gati për t’u përballur me këtë “tsunami turistik”? Shumë ekspertë e vënë në dyshim dhe paralajmërojnë se pa një strategji të qartë, vendi rrezikon të shkatërrojë thesaret natyrore dhe kulturore që e kanë bërë kaq tërheqës për vizitorët në radhë të parë.
