Një turist britanik ka humbur jetën dhe partnerja e tij është gjetur në situatë kritike nga Policia Kufitare, gjatë një patrullimi në ujërat detare shqiptare ditën e sotme (1 qershor), pak pasi kishin marrë njoftimin për një aksident të mundshëm te zona e “Shkëmbit të Kavajës”, në Durrës.
Policia Kufitare bëri me dije se ka transportuar dy shtetas të huaj, nga të cilët njëri, O.S., 34 vjeç, ka humbur jetën dhe personi tjetër, V.B., 31 vjeçe, të dy banues në Angli, u mor nga ambulanca në gjendje shoku.
Nga hetimi paraprak rezulton se drejtuesi i motorit të ujit ‘Jet Ski’ ka humbur kontrollin gjatë manovrave, por dinamika mbetet ende e paqartë dhe hetimet janë paraprake.
“Rreth orës 11:15, (1 qershor), shërbimet e Policisë Kufitare Port Durrës janë njoftuar se, në zonën përballë Shkëmbit të Kavajës, dy shtetas që lundronin me një mjet lundrues Jet Ski, dyshohet se gjatë manovrave kanë humbur kontrollin mbi mjetin lundrues dhe kanë rënë në ujë”, sqaroi policia dinamikën e ngjarjes.
Menjëherë pas njoftimit, shërbimet kanë shkuar me mjet lundrues në ndihmë të dy shtetasve që kishin rënë në ujë, duke bërë transportimin e tyre për në port, me qëllim dërgimin më tej drejt spitalit për mjekim.
“Nga verifikimet paraprake të ekipit të urgjencës së spitalit, që ishte në pritje në port, rezultoi se njëri prej shtetasve që lundronin me Jet Ski, konkretisht shtetasi S. O., 34 vjeç, banues në Angli, kishte humbur jetën, ndërsa shtetasja V. B., 31 vjeçe, banuese në Angli, u transportua menjëherë për në spital në gjendje të rëndë shëndetësore”, sqaroi policia.
Policia njofton se është ngritur një grup i posaçëm hetimor që, nën drejtimin e Prokurorisë, po punon për të zbardhur rrethanat e ngjarjes dhe për të kryer dokumentimin e plotë ligjor të rastit.
Fillimisht personat nuk kishin mjete identifikuese, teksa nisi hetimi i gjerë për zbardhjen e plotë të ngjarjes dhe identiteteve.
Kur policia mbërriti, mjetit ishte i fikur. Dyshohet se çifti ka marrë dëmtime gjatë aksidentit apo dhe mbytjes pas rënies në ujë. Mbetet i panjohur itinerari i tyre dhe për sa kohë kishin në det të hapur apo në lundrim. Dëshmitë dhe ekspertimi do të zbulojë detaje të tjera rreth dinamikës dhe shkaqeve.
Skafi i kufirit ka bërë transportimin e tyre në port te kalata zero. Ndërkohë teksa mbërriti autoambulanca, fatkeqësisht njëri prej tyre ndërroi jetë, kurse tjetri u dërgua në spital në gjendje të rëndë.
Për rastin është ngritur edhe grupi hetimor, teksa priten rezyultatet e ekspertimit mjeko-ligjor dhe dëshmitë nga e mbijetuara.
