“Shkaku i zjarrit që ra në nënstacionin që mbylli aeroportin më të madh Heathrow në mars të këtij viti ishte për shkak të një defekti teknik.”
Kështu thotë raporti nga Operatori Kombëtar i Sistemit të Energjisë, problem i cili sipas tyre ishte i parandalueshëm pasi National Grid kishte qenë në dijeni shtatë vjet më parë, por nuk arriti ta rregullonte.
Hetuesit tregojnë se zjarri që ndërpreu energjinë elektrike në aeroport, duke prekur më shumë se 1,350 fluturime dhe pothuajse 300,000 pasagjerë, mund të jetë shkaktuar nga lagështia që hyri rreth telave.
Në përgjigje të gjetjeve të raportit, Ofgem, rregullatori i energjisë për Britaninë e Madhe, ka nisur një hetim ndaj National Grid. Ofgem do të shqyrtojë nëse National Grid ishte në përputhje me legjislacionin dhe kushtet në lidhje me mirëmbajtjen e sistemit të energjisë elektrike.
Aeroportit më të ngarkuar në Europë i duhej shtatë orë për t’u rihapur pasi u rikthye energjia elektrike, sipas raportit, që do të thotë se fluturimet u ndërprenë për gati 24 orë pas shpërthimit të zjarrit.
Operatori Kombëtar i Sistemit të Energjisë ka deklaruar se është e rëndësishme që të nxirren mësimet e duhura nga ky incident për të parandaluar raste të tilla në të ardhmen, aty ku është e mundur, dhe për t’i menaxhuar ato në mënyrë efektive kur ato ndodhin.
