Diogo Jota, sulmuesi i Liverpool, ka ndërruar jetë në një aksident rrugor.
Aksidenti tragjik për futbollistin 28-vjeçar portugez ka ndodhur në Zamora të Spanjës.
Në makinën ku po udhëtonte lojtari i famshëm ka qenë edhe vëllai i tij 26-vjeçar, Andre, i cili gjithashtu nuk i ka mbijetuar aksidentit.
Raportohet se automjeti ku udhëtonin dy vëllezërit u përfshi nga flakët, duke u marrë jetën.
Sipas mediave, Diogo Jota dhe vëllai u dogjën në aksident deri në shfytyrim, mbetjet e tyre u dërguan në një institut mjeko-ligjor.
Diogo Jota vetëm dy javë më parë ishte martuar me të fejuarën e tij, Rute Cardoso, me të cilën ka tre fëmijë.
Diogo Jota iu bashkua Liverpulit në vitin 2020 nga Uolves për 44.7 milionë euro.
Që atëherë, ai ka bërë 182 paraqitje për të kuqtë, duke shënuar 65 gola dhe duke dhënë 26 asiste.
Gjatë kësaj kohe, ai ka fituar tre tituj me Liverpulin, një titull të Premier Ligë (2024-25), një titull të Kupës FA (2021-22) dhe një titull të League Cup (2021-22).
Së fundmi Jota fitoi titullin e Ligës së Kombeve me Portugalinë kundër Spanjës.
Ky ishte titulli i fundit që ai do të fitonte në karrierë përpara se të ndërronte jetë pas aksidentit fatal me makinë.
(Në videon më poshtë, vendi i aksidentit dhe pamjet që tregojnë si është shkrumbuar komplet makina me të cilën udhëtonin vëllezërit Jota)
