Reperi i njohur shqiptar, Noizy (emri i vërtetë Rigels Rajku), është arrestuar të shtunën në aeroportin e Zyrihut nga autoritetet zvicerane. Ai kishte mbërritur në Zvicër për të promovuar albumin e tij të ri, por u ndalua menjëherë në hyrje të vendit.
Sipas burimeve zyrtare, arrestimi u bë me urdhër të prokurorisë për krime të rënda me dhunë. Deri më tani, nuk janë dhënë detaje të sakta mbi veprat konkrete për të cilat ai akuzohet.
Klubi “Rinora 4” në Rümlang, ku Noizy kishte planifikuar të mbante një koncert, ka fshirë të gjitha njoftimet për eventin nga faqet e tij zyrtare, duke konfirmuar anulimin e mbrëmjes muzikore.
Problemet me ligjin nuk janë të reja për reperin
Kjo nuk është hera e parë që Noizy përballet me drejtësinë. Në gusht të vitit të kaluar, ai u arrestua në Shqipëri pas një përleshjeje të dyshuar në një disko. Për atë ngjarje, ai u shpall në kërkim, por u la i lirë me kusht pas disa ditësh.
Më vonë, në nëntor të 2024-s, ai u dënua me një gjobë prej 15 mijë eurosh.
Ende nuk dihet nëse arrestimi në Zvicër lidhet me ngjarjen në Shqipëri apo me një rast tjetër.
