Prej orëve të para të mëngjesit të sotëm tregtarët e Tregut Elektrik kanë dalë në protestë kundër projektit të bashkisë për shembjen e tregut në zonën e “Ali Demit.”
Ata kanë marrë një urdhër që deri në orën 9 duhet të lirojnë tregun pasi në 10 do të fillojë punën për shembjen fadroma.
Sipas tyre bashkia nuk i ka njoftuar se ku do të zhvendosen bizneset e tyre pas shembjes, njoftoi Oranews.
“Ky është një turp që bën bashkia. Janë 232 veta që punojnë këtu. Ne i dhamë votën për më mirë jo të na lërë në mes të rrugëve. Po bëjnë masakër me tregtarët” tha një përfaqësues i tregtarëve i cili mohoi dhe ekzistencën e një peticioni të firmosur prej tyre për prishjen e tregut. Na kanë thënë shkoni ku të doni, do ta prishim.
Paguajmë taksat një më një.” Tregtarët kërkojnë që bashkia tu gjejë një vend ku do të ushtrojnë biznesin e tyre.
“Kontenierët i ka vendosur bashkia jo ne. 30 vjet që paguajmë taksa. Jemi tregtarë të licencuar jo ambulantë. Nuk kemi pasur asnjë negociim. Tani na thotë të shkojmë në Shkozë. Ta sistemojë vendin bashkia dhe të mos na lërë rrugëve.”
Më pas tregtarët e zhvendosën protestën para bashkisë së Tiranës.
