Zëvendëspresidenti amerikan, JD Vance, është i gatshëm të marrë detyrën e presidentit “nëse, mos e dhëntë Zoti, i ndodh një tragjedi e tmerrshme” Donald Trumpit.
Në një intervistë të gjatë për USA TODAY, Vance tha se është i bindur që presidenti amerikan do ta përfundojë mandatin, duke shtuar se edhe ai vetë ka kaluar një përvojë të jashtëzakonshme gjatë 200 ditëve të fundit.
Pavarësisht pyetjeve të fundit mbi gjendjen fizike të presidentit, Vance pohon se Trump është në një gjendje shëndetësore të jashtëzakonshme.
“Ai ka një energji të jashtëzakonshme, dhe megjithëse shumica e njerëzve që punojnë rreth presidentit të Shteteve të Bashkuara janë më të rinj se ai, mendoj se e kuptojmë që ai është personi i fundit që fle, i fundit që bën telefonata në mbrëmje, dhe i pari që zgjohet e që telefonon në mëngjes”, tha ai.
“Po, ndodhin tragjedi të tmerrshme, por unë jam shumë i bindur që presidenti i Shteteve të Bashkuara është në formë të mirë, se do ta përfundojë mandatin e tij dhe do të bëjë gjëra të mëdha për popullin amerikan. Dhe nëse, mos e dhëntë Zoti, ndodh një tragjedi e tmerrshme, nuk mund të imagjinoj një trajnim më të mirë në detyrë sesa ai që kam marrë gjatë 200 ditëve të fundit”, përfundoi Vance.
Komentet e Vance vijnë pas shqetësimeve të shfaqura në publik për shëndetin e Trumpit, të nxitura nga shenjat e mavijosura që ishin vënë re në krahët e tij. Në paraqitjet e mëvonshme, duket se ato ishin përpjekur të mbuloheshin me grim të vendosur dobët.
Mavijosjet ishin parë për herë të parë verën e kaluar, kur zëdhënësja e atëhershme e fushatës, Karoline Leavitt – aktualisht sekretare për shtyp në Shtëpinë e Bardhë – i kishte atribuuar ato punës së vazhdueshme të Trumpit dhe shtrëngimeve të duarve me njerëzit gjatë gjithë ditës.
Shqetësimet u shfaqën sërish muajin e kaluar pas publikimit të disa fotove ku 79-vjeçari kishte ënjtje të dukshme në kyçet e këmbëve. Mjeku i presidentit, Dr. Sean Barbabella, publikoi një memorandum ku e lidhi ënjtjen me pamjaftueshmëri kronike venoze, një gjendje të zakonshme dhe të padëmshme për moshën e Trumpit.
Çfarë thotë Amendamenti i 25-të?
Sipas Amendamentit të 25-të të Kushtetutës së SHBA-së, nënpresidenti merr plotësisht detyrën e presidentit nëse ky i fundit vdes, jep dorëheqje apo shkarkohet nga detyra.
Në historinë amerikane janë regjistruar nëntë raste kur nënpresidenti ka zëvendësuar presidentin gjatë mandatit. Për shembull, Calvin Coolidge u bë president pasi Warren G. Harding vdiq papritur më 2 gusht 1923.
