Për kryeministrin britanin Keir Starmer, sigurimi i investimeve rekord nga SHBA justifikoi ftesën që i bëri presidentit Donald Trump për një vizitë shtetërore të dytë, një hap me rrezik që synonte ta mbante presidentin në anën e tij.
Trump e festoi vizitën duke shpallur 150 miliardë paund investime në sektorët e teknologjisë, financës dhe energjisë në Mbretërinë e Bashkuar. Opinioni publik ishte i ndarë për faktin që Starmer po afrohej shumë me Trump, por marrëveshjet e arritura i dhanë atij një shtysë shumë të nevojshme pas disa prej javëve të vështira në udhëheqjen e vendit.
Gjatë vizitës, dy qeveritë shpallën një seri investimesh korporative amerikane në Britani, me grupin Blackstone që premtoi 100 miliardë paund në 10 vite dhe Microsoft që do të investojë 22 miliardë paund. Trump theksoi se SHBA kërkon të fitojë garën globale në inteligjencën artificiale, dhe me Kinën si sfiduesin kryesor, Britania ka zgjedhur të bashkëpunojë ngushtë me Amerikën për të siguruar ndërtimin e qendrave të të dhënave dhe superkompjuterëve.
Sipas liderit amerikan, ishte e rëndësishme që Britania të varej prej Shteteve të Bashkuara në këtë sektor. “Jemi të përkushtuar për të siguruar që Britania të ketë furnizim të sigurt dhe të besueshëm me hardware dhe software, si dhe pajisjet më të mira në botë,” shtoi Trump. Investimet synojnë të kombinojnë fuqinë amerikane në infrastrukturën e inteligjencës artificiale dhe aftësitë financiare të SHBA-së me inovacionin dhe kreativitetin britanik, që vijnë nga universitete, startup-e dhe kompani të mëdha.
Por jo të gjithë e mbështetën marrëveshjen. Disa analistë argumentojnë se kjo mënyrë lidhjeje do të rriste varësine e Britanisë nga Shtetet e Bashkuara. “Nëse inteligjenca artificiale britanike ndërtohet mbi infrastrukturë, software dhe qendra të dhënash amerikane, atëherë fuqia jonë në aspektin politik është komprometuar”, shprehen ata. Marrëdhëniet e ngushta me SHBA-në gjithashtu rrisin rrezikun që Britania të kufizojë aftësinë për të eksportuar në Bashkimin Evropian, partnerin e saj tregtar më të madh.
