Sipas një raportimi të gazetës britanike Mirror, presidenti amerikan Donald Trump është shprehur në mënyrë humoristike se, në fund të vizitës së tij zyrtare në Mbretërinë e Bashkuar, ishte “ngopur” nga të gjitha bukuritë dhe vendet historike që i ishin prezantuar gjatë qëndrimit.
Komentet, thuhet se u bënë gjatë një eventi privat në rezidencën Checkers, ku ishin të pranishëm drejtues të industrisë së teknologjisë. “Kalova mrekullisht. Më çuan në Kalanë e Windsor-it, pashë gjëra të mrekullueshme. Edhe në Checkers – sërish gjëra të mrekullueshme. Kam parë çdo monument… por tani jam ngopur,” u shpreh Trump me ironi.
Më tej, ai thuhet se është shprehur me humor se, kur Mbreti të vizitojë Uashingtonin, nuk ka ndërmend ta çojë në ndonjë monument historik:
“Do organizoj një darkë zyrtare. Mund të vish, të hash dhe të shkosh direkt në gjumë. Nuk ka nevojë të të shëtis në Memorialin e Linkolnit,” citohet të ketë thënë Trump.
Deklaratat e tij shkaktuan reagime në Mbretërinë e Bashkuar. Përfaqësuesi i Liberal Demokratëve për çështjet e kulturës, Max Wilkinson, u shpreh me ironi:
“Kjo po që është mirënjohje! Ndoshta herën tjetër duhet ta çojmë në një studio të bronzimit artificial dhe t’i japim një Happy Meal.”
