Pamje të reja të publikuara online tregojnë momentin kur një bandë hajdutësh u largua nga Muzeu i Luvrit nëpërmjet një ashensori të montuar mbi kamion, pasi kishin grabitur tetë objekte të çmuara nga stolitë mbretërore të Francës.
Në videon e filmuar, dy persona, njëri me jelek reflektues dhe tjetri me helmetë motoçiklete, shihen teksa ashensori zbret ngadalë nga ballkoni i katit të parë të muzeut, që ata e kishin përdorur për të hyrë në galeri. Pasi arritën në trotuar, pamja e tyre u bllokua nga një gardh prej druri. Më pas, ata u larguan me skuterë elektrikë drejt pjesës lindore të Parisit.
Grabitja ndodhi për vetëm 7 minuta, por dëmi që shkaktoi është cilësuar i krahasueshëm me tragjedinë e djegies së Katedrales së Notre-Dame në vitin 2019. Kamioni, një Mitsubishi Canter Fuso me shkallë 27 metra, ishte vjedhur në qytetin Louvres, dy milje nga aeroporti Charles de Gaulle. Para grabitjes, autorët kishin lyer mjetin me ngjyrë gri dhe kishin ndryshuar targat për të fshehur origjinën e tij.
Pasi kryen grabitjen në mes të ditës së diel, hajdutët tentuan t’i vinin flakën kamionit, por ndërhyrja e rojeve të sigurisë i detyroi të largoheshin me nxitim. “Rojet dolën menjëherë jashtë dhe i bënë të ikin. Falë tyre, u shmang një zjarr i madh”,– tha drejtuesja e shërbimit të sigurisë së Luvrit, në një regjistrim të siguruar nga BFMTV.
Hetimet kanë zbuluar se stolitë e vjedhura ruheshin në një vitrinë moderne prej xhami të përforcuar, e cila ofronte më pak mbrojtje se struktura e mëparshme historike e zëvendësuar në vitin 2019.
Drejtoresha e Luvrit, Laurence des Cars, mësohet se i ka ofruar dorëheqjen presidentit Emmanuel Macron, por ai e ka refuzuar. Në një dëgjesë në Senatin francez, ajo pranoi se sistemi i kamerave të jashtme të muzeut është “i vjetëruar” dhe kërkoi ngritjen e një stacioni policie brenda godinës.
Në total, janë vjedhur bizhuteri me vlerë rreth 88 milionë euro, përfshirë një varëse që Napoleoni Bonaparti i kishte dhuruar Marie-Louise të Austrisë, si dhe një kurorë, një varëse dhe një palë vathë të Mbretëreshës Hortense, bashkë me disa stoli të Perandoreshës Eugénie, bashkëshortja e Napoleonit III.
Grabitja e guximshme, e kryer në mes të ditës dhe e regjistruar nga kamerat, ka ngritur sërish pikëpyetje të mëdha mbi sigurinë e një prej institucioneve kulturore më të famshme në botë.
