Presidenti Volodymyr Zelensky ka deklaruar se Ukraina ka nevojë për mbështetje financiare nga ana e Europës për të vazhduar luftën kundër forcave ruse për dy ose tre vjet të tjera.
“E theksova përsëri për të gjithë udhëheqësit evropianë. U thashë atyre se nuk do të luftojmë për dekada, por ju duhet të tregoni se për njëfarë kohe do të jeni në gjendje t’i ofroni mbështetje të qëndrueshme financiare Ukrainës. Dhe kjo është arsyeja pse ata e kanë në mendje këtë program, 2-3 vjet”, tha Zelensky, duke iu referuar një propozimi të Komisionit Evropian për të zhbllokuar gradualisht asetet e ngrira ruse për të financuar Ukrainën.
Gjithashtu, Zelensky i kërkoi presidentit të Shteteve të Bashkuara të Amerikës, Donald Trump të ushtrojë presion mbi udhëheqësin kinez Xi Jinping në mënyrë që të ulë mbështetjen e tij për Rusinë kur të dy udhëheqësit të takohen më vonë këtë javë.
“Mendoj se kjo mund të jetë një nga lëvizjet e forta të (Trump), veçanërisht nëse, pas këtij hapi vendimtar të sanksioneve, Kina është gati të ulë importet” nga Rusia, u tha Zelensky gazetarëve, në një konferencë për mediat.
Trump goditi dy kompani të mëdha ruse të naftës me sanksione javën e kaluar dhe u ka bërë thirrje blerësve të eksporteve jetësore të energjisë së Moskës – konkretisht Kinës dhe Indisë – të ulin blerjet e tyre, për të cilët, Uashingtoni dhe Kievi thonë se financojnë pushtimin e Rusisë.
