Më shumë se 40 persona dihet se kanë vdekur pasi rrëshqitje të shumta toke goditën rajonin malor kufitar të Kenias dhe Ugandës javën e kaluar.
“Humba një gjyshe, një teze nga ana e nënës, një xhaxha, dy motra, një mik familjar dhe një kushëri. Ata po qëndronin së bashku në fshatin Kaptul”, tha Felix Kemboi për BBC-në në anën keniane.
Aq i pikëlluar ishte 30-vjeçari Feliks saqë mezi e përshkruajti përvojën me fjalë.
Në të dyja anët e kufirit, shumë njerëz janë ende të zhdukur dhe ekipet e kërkim-shpëtimit janë dërguar për t’i gjetur ata, mes paralajmërimeve se mund të ndodhin më shumë rrëshqitje toke.
“Ndërsa reshjet e dendura të shiut vazhdojnë të bien në disa pjesë të vendit, rreziku i rrëshqitjeve të dheut, veçanërisht përgjatë rajonit të Luginës Kerio, është rritur”, paralajmëron Ministri i Brendshëm kenian Kipchumba Murkomen.
Ai po u bën thirrje banorëve të zonave të prekura të jenë të kujdesshëm ndaj çdo lëvizjeje të tokës dhe thotë se autoritetet lokale po i zhvendosin ata që janë në rrezik në vende më të larta.
Katërmbëdhjetë nxënës shkolle ishin midis dhjetëra kenianëve të vrarë kur dy rrëshqitje balte goditën zonën e Luginës së Madhe Rift, sipas ministrisë së arsimit të vendit.
Të mbijetuarit në Ugandën lindore kanë ndarë rrëfime të tmerrshme me BBC-në.
“Po flinim natën, [dëgjuam] një zhurmë të madhe. Fqinjët erdhën duke vrapuar. ‘Zgjohuni!’. Mali po vjen. Mbesa dhe vëllai im vdiqën”, kujton Helda Narunga Masai.
Shtëpia e saj në fshatin Kween u shkatërrua nga rrëshqitja e dheut dhe tani ajo po jeton me një fqinj.
Rreth 14 km (tetë milje) më tej në rrugë, në Kapchorwa, tre fëmijë dhe një grua nga e njëjta familje u vranë.
Punonjësit e Kryqit të Kuq të Ugandës thonë se të paktën 18 persona kanë vdekur në lindje të vendit dhe stafi i tyre së bashku me vullnetarët e komunitetit po kërkojnë 20 personat ende të pagjetur në distriktet Kapchorwa, Bukwo dhe Kween.
Mande David Kapcheronge, një udhëheqës lokal, i ka thënë BBC-së se ekipet e shpëtimit po përdorin mjete rudimentare për të gërmuar grumbuj balte gjatë operacionit të rimëkëmbjes.
Ekspertët kanë paralajmëruar kundër ndërtimit të shtëpive në disa nga zonat e prekura në Ugandë dhe Kenia, ku rrëshqitjet e dheut janë një problem i njohur.
Në vitin 2010, një rrëshqitje toke në qytetin Bududa të Ugandës vrau rreth 300 njerëz, duke e bërë atë një nga katastrofat natyrore më shkatërruese të vendit.
Në përgjigje të kësaj katastrofe të fundit, qeveria e Ugandës po u paguan familjeve të viktimave 5 milionë shilinga (1,300 dollarë; 1,000 £) dhe 1 milion shilinga për secilin të mbijetuar.
Qeveria keniane ende nuk ka njoftuar kompensimin për të mbijetuarit ose të afërmit e tyre.
Në Ugandë, misionet e kërkimit janë penguar nga rrëshqitjet e dheut që kanë bllokuar aksesin në disa rrugë.
Raportim shtesë nga Natasha Booty
