Presidenti i SHBA-së, Donald Trump ka bërë të ditur sot se ka emëruar John Coale si të dërguar special të SHBA-së për Bjellorusinë, me qëllim lirimin e më shumë të burgosurve politikë të mbajtur nga regjimi i diktatorit Aleksandër Lukashenko.
“Ai tashmë ka negociuar me sukses lirimin e 100 pengjeve dhe po shkon për 50 të tjerë” shkroi Trump në rrjetin e tij Truth Social.
Ky njoftim vjen pas përpjekjeve të SHBA-së në shtator për të liruar dhjetëra të burgosur politikë, duke përfshirë figura opozitare, gazetarë, protestues dhe shtetas të huaj.
John Coale, i cili aktualisht shërben si zëvendës i dërguari special për Ukrainën dhe ish-avokat personal i Trumpit, ka ndihmuar në negociatat për lirimin e të burgosurve gjatë vizitës së tij në Minsk në shtator.
Pas lirimit, Uashingtoni hoqi sanksionet ndaj Belavias, linjës ajrore shtetërore të Bjellorusisë, që kishte qenë nën kufizime që nga gushti 2023.
Nga ana e tij, Minsku ka intensifikuar përpjekjet për të dalë nga izolimi diplomatik i imponuar nga Perëndimi për rolin dhe mbështetjen ndaj pushtimit rus të Ukrainës.
Minsku ka përballur sanksione të rënda politike dhe ekonomike perëndimore për mbështetjen ndaj Moskës, si dhe për mashtrimin masiv zgjedhor që i mundësoi Lukashenkos të mbajë pushtetin në zgjedhjet presidenciale të 2020-ës, të kontestuara gjerësisht.
I dërguari i Trumpit, Keith Kellogg, zbuloi në fund të shtatorit se qëllimi i dialogut të ripërtërirë me Bjellorusinë është “të sigurojë linja komunikimi” me presidentin rus Vladimir Putin, si pjesë e përpjekjeve më të gjera për të përfunduar luftën në Ukrainë.
Gjithashtu, Lukashenko ka shprehur gatishmëri për të forcuar lidhjet nëse kjo sjell përfitime për Minskun.
“Do të doja të falënderoj, paraprakisht, Presidentin e nderuar të Bjellorusisë, Aleksandër Lukashenko, për konsideratën e tij për lirimin e këtyre njerëzve shtesë”, përfundon Trump në postimin e tij.
