Qeveria e Mbretërisë së Bashkuar njoftoi se paga minimale do të rritet me 4.1%, duke arritur në 12.71 paund në orë nga muaji prill i vitit të ardhshëm, për ta mbajtur në linjë me pagën mesatare, pavarësisht ankesave të disa punëdhënësve se kjo do të shtrenjtojë çmimet. Paga minimale britanike është e dyta më e lartë në Evropë në raport me pagën mesatare dhe është zgjeruar mbi 60% që nga viti 2019.
Ministrja e Financave, Rachel Reeves, tha se kjo masë, që pason një rritje prej 6.7% më herët këtë vit, është e nevojshme “që ata me të ardhura të ulëta të shpërblehen siç duhet për punën e tyre”. Nga ky vendim do të përfitojnë 2.4 milionë punonjës të moshës 21 vjeç e lart, ndërsa 300,000 të tjerë, praktikantë dhe punonjës nën 21 vjeç, do të gëzojnë shtesa prej 6.0% deri në 8.5%, ndërsa qeveria vazhdon të heqë gradualisht pagën minimale më të ulët për këto kategori.
Lajmi është publikuar para se Reeves të prezantojë buxhetin vjetor, në të cilin priten rritje të mëdha taksash me vlerë dhjetëra miliarda paund. “Kostoja e jetesës mbetet shqetësimi numër një për njerëzit që punojnë dhe ekonomia nuk funksionon mjaftueshëm mirë për ata me të ardhura më të ulëta,” tha Reeves.
Ndërkohë, masa u kritikua nga industria e mikpritjes në Britani, që paralajmëroi se kjo do të çojë në rritje çmimesh. Po ashtu, sipas industrisë, rritja më e lartë e pagave për punëtorët me më pak përvojë mund ta bëjë më të vështirë për të rinjtë të gjejnë punë.
Britania kishte normën më të lartë të inflacionit mes ekonomive të mëdha të zhvilluara në tetor, me 3.6%, e nxitur pjesërisht nga ngritja e shpejtë e pagave pas pandemisë.
Ndërsa Banka e Anglisë pret që inflacioni të kthehet në objektivin 2% deri në mesin e vitit 2027, shumë nga politikëbërësit e saj mendojnë se rritja e rrogave mbi 3% do ta vështirësojë këtë objektiv, për shkak të produktivitetit ende të dobët. Punëdhënësit kanë thënë se kostot më të larta të punës kanë ndikuar në uljen e punësimeve këtë vit, ndërsa norma e papunësisë ka arritur nivelin më të lartë që nga viti 2021, në 5.0%.
