Presidenti i Republikës, Ilir Meta gjatë një intervistë për Euronews Albania ka komentuar ligjin e sapo miratuar në Parlament nga mazhoranca për mënyrën e kryerjes së betimit për anëtarët e rinj të Gjykatës së Lartë dhe asaj Kushtetuese, Meta u shpreh se, do të shprehet në momentin kur ligji t’i mbërrijë në zyrë për dekretim.
“Nuk e di se çfarë ka ndodhur në Parlament, por prej kohësh në Parlamentin tonë është lajm kur miratohet ndonjë ligj në respekt të Kushtetutë. Shkelja e Kushtetutës është kthyer në një sport të preferuar të mazhorancës.
Nuk dëshiroj të komentoj diçka që nuk e kam lexuar, por në vijim të marrëzimit që ka ndodhur me zbatimin antikushtetues të reformës në drejtësi. Nuk habitem që të ketë ndodhur ndonjë marrëzi e tillë. Kur ligji të mbërrijë në Presidencë do të shprehem në mënyrë zyrtare.
Nuk ekziston asnjë mekanizëm ligjor që rrëzon Kushtetutën, këto janë përpjekje për të dënuar me vdekje çdo minimum kredibiliteti që mund t’i ketë mbetur reformës në drejtësi”, është shprehur Meta.
Presidenti i Republikës duke folur më tej për përplasjen me anëtarin e Gjykatës së Lartë, Ardian Dvorani për emërimin e anëtarëve të Gjykatës Kushtetuese, tha se z. Dvorani ka kryer shpërdorim të detyrës dhe ka përvetësuar kompetenca e Presidentit.
Por, në të gjithë këtë debat, z. Meta tha se gjithçka është bërë me urdhër politik të Kryeminisrit Edi Rama për t’i marrë presidentit të drejtën e emërimit të një anëtari të Gjykatës Kushtetuese. Përgjegjës për këtë situatë, Presidenti bëri dhe delegacionin e Bashkimit Evropian në Tiranë dhe Euralius.
“Kjo është një drejtësi e vdekur. Unë nuk luftojë për një Gjykatë kushtetuese të Ilir Metës. Unë po mbroj një Gjykatë Kushtetuese me integritet. Çdo zgjedhje që bëja unë, ndryshonte zgjedhja për Kuvendin dhe çdo zgjedhje që bënte kuvendi ndikonte në zgjedhjen time. Ata bënë një lojë të trashë që nuk ka diplomat të korruptuar në Bruksel, Uashington për të relativiziuar përgjegjësinë e z. Dvorani. Ka shpërdoruar detyrën dhe ka përvetësuar kompetencën e tjetër kujt. KHD e ka miratuar listën në një ditë, Kurse Dvorani e ka ribotuar listën pa mbledhje. E ka bërë për të krijuar një ide mashtruese dhe këtë Kuvendi ta merrte të mirëqenë dhe ne po ia rruajmë Presidentit anëtarin e Gjykatës Kushtetuese”, u shpreh z. Meta.
“Patjetër që gjithë këtë e ka bërë Rama , se Ruçi nuk do ta bënte, ka një respekt dhe do të më kthente një përgjigje. Fakti që nuk ka kthyer përgjigje, do të thotë se është bërë me urdhër të Ramës”, shtoi Presidenti.
Duke folur më tej për sabotim të reformës në drejtësi, z. Meta etiketoi si “heroinë të reformës” ish-ambasadoren e BE-së në Tiranë, Romana Vlahutin. Gjithashtu, Presidenti përfshiu në këtë mesele dhe Euralius, pasi refuzoi të merrte pjesë në një mbledhje informale të thirrur për sqarimin e mosmarrëveshjeve mes institucioneve për këtë çështje.
I pyetur nëse ka ndryshuar qasja e delegacionit të Bashkimit Evropian, z. Meta u përgjigj se, zyra e BE në Tiranë ka përgjegjësi për kapjen e reformës në drejtësi nga mazhoranca qeverisëse.
“Kjo është një çështje mjaft evidente, ata kanë humbur mundësitë për të luajtur rolin e tyre që reforma të bëhej siç është në Kushtetutë. Përgjegjësia e tyre është shumë e madhe. Por nuk dua t’i hyj kësaj çështjeje, unë kam qenë mjaft bashkëpunues me të gjithë”, deklaroi Presidenti.
Duke folur për mundësinë e shpërndarjes së Parlamentit, duke qenë se nuk është i plotë numri i deputetëve, Meta u shpreh se, ky institucion është ilegjitim dhe duhet të vetëshpërndahet.
“Mendoj se ky Kuvend që bën veprime të tilla, që po shton me shpejtësi delegjitimimin e të gjithë institucioneve, e vetmja punë e mirë që i ka mbetur të bëjë është të vetëshpërdahet. Është një dëshmi e përditshme e asaj që nuk ka asnjë lidhje me realitetin dhe nuk ofron asnjë garanci për normalitet politik dhe institucional të vendit. Parlamenti është jashtë standardeve të Kushtetutës. Dhe zëvendësimi i deputetëve është kryer jashtë procedurave ligjore”, deklaroi më tej Presidenti.
