Shtetet e Bashkuara kryen një tjetër bombardim ajror në Oqeanin Paqësor dje, të hënën, duke goditur një mjet lundrues të shpejtë që dyshohet se i përkiste trafikantëve të drogës, duke shkaktuar vdekjen e dy personave.
Lajmi u bë i ditur nga Komanda e Përbashkët e Forcave të Armatosura të SHBA-së përgjegjëse për Amerikën e Jugut (SOUTHCOM), në kuadër të një fushate që është në zhvillim prej shtatorit të vitit 2025.
Me këtë sulm të ri, i cili u njoftua përmes platformës X, numri i viktimave arrin të paktën në 130 të vdekur, ndërsa të paktën 38 mjete lundruese janë shkatërruar që prej shtatorit, kur nisi fushata amerikane e bombardimeve kundër mjeteve që, sipas Uashingtonit, i përkisnin rrjeteve të trafikut të drogës.
Ky është sulmi i tretë ajror i këtij lloji i konfirmuar që nga fillimi i këtij viti.
Elementi më i pazakontë i bombardimit të djeshëm është fakti se ushtria amerikane raportoi për ekzistencën e një “të mbijetuari”, duke shtuar se njoftoi “menjëherë” rojen bregdetare për të ndërmarrë një operacion “kërkimi dhe shpëtimi” në zonën detare.
