Qytetarët britanikë të bllokuar në Lindjen e Mesme i kanë thënë BBC-së se ka pasur mungesë informacioni në lidhje me rrugët e disponueshme për t’u kthyer në shtëpi, ndërsa sulmet hakmarrëse të Iranit në të gjithë rajonin vazhdojnë.
Fluturimi i Teigan McFadden për në shtëpi nga Dubai të martën u anulua dhe 21-vjeçarja thotë se po i mbarojnë ilaçet për zemrën, ndërsa një familje tjetër i tha BBC-së se kishin mbetur të bllokuar në Oman pasi fluturimi i tyre nga Malajzia ishte devijuar.
Udhëtimi ajror në Lindjen e Mesme është ndërprerë rëndë që nga e shtuna, me mijëra fluturime të anuluara.
Sekretarja e Jashtme Yvette Cooper u tha deputetëve të martën se “siguria dhe mbrojtja” e shtetasve britanikë ishte një “prioritet kryesor”.
Ajo i tha Dhomës së Komunave se një fluturim çarter qeveritar do të fluturonte nga Muscat në Oman në ditët në vijim, duke i dhënë përparësi shtetasve vulnerabël.
Qeveria po punon gjithashtu me linjat ajrore për rritjen e kapacitetit nga Muscat për shtetasit britanikë, tha ajo, duke shtuar se britanikët “duhet të presin të kontaktohen nga Ministria e Jashtme në lidhje me këto mundësi”.
British Airways ka njoftuar se do të operojë një fluturim nga Muscati, për në Heathrow të Londrës, duke u nisur të enjten në orën 02:30 sipas kohës lokale (22:30 GMT të mërkurën).
“Aktualisht nuk mund të operojmë fluturime nga destinacione si Dubai, Doha, Abu Dhabi, Bahrein, Aman dhe Tel Aviv”, tha linja ajrore.
“Ne po vazhdojmë të bëjmë gjithçka që mundemi për të mbështetur klientët dhe kolegët në rajon dhe jemi në kontakt të rregullt me ta.”
Fluturimet janë anuluar në të gjithë rajonin që nga e shtuna, kur SHBA-të dhe Izraeli nisën sulme ndaj Iranit, duke vrarë Udhëheqësin Suprem Ajatollah Ali Khamenei. Irani u hakmor me sulme në të gjithë rajonin.
McFadden, nga Belfasti, i tha BBC-së se ishte regjistruar në Ministrinë e Jashtme, por ende nuk kishte marrë ndonjë informacion.
Ajo tha: “U regjistrova për email-in qeveritar dhe i vetmi email që kam marrë është ‘faleminderit që u regjistrove për këtë’.
“Ndjehem sikur jam në zonën gri. Kompania ime ajrore nuk më ka kontaktuar shumë, më është dashur t’i kontaktoj për të zbuluar se fluturimi im ishte anuluar.”
McFadden ka mbetur brenda hotelit të saj në Dubai që nga fundjava dhe e përshkroi situatën si “të tmerrshme”.
Ajo shtoi se po i mbaronin ilaçet për një sëmundje të zemrës të njohur si Sindroma e Takikardisë Ortostatike Posturale, me stresin që i përkeqësonte simptomat dhe bënte që ajo të humbiste ndjenjat.
Layla Wildon, 44 vjeç, bashkëshorti i saj Andrew dhe dy fëmijët – Ophelia, 10 vjeç, dhe Elysia, tetë vjeç – po udhëtonin për në Mbretërinë e Bashkuar nga Malajzia nëpërmjet Dohas të shtunën kur u devijuan në Muscat.
Wildon i tha BBC-së se familja nuk kishte marrë asnjë njoftim nga linjat ajrore dhe, ndërsa ishin vendosur në një hotel, nuk kishin qasje në bagazhet e tyre.
“Një formë kontakti për të dhënë një tregues të opsioneve do të bënte një ndryshim të madh”, tha ajo, ndërsa pranoi se ishte një kohë e vështirë për stafin e aeroportit.
Çifti po përpiqet të punojë nga distanca dhe janë të shqetësuar për gjetjen e një kafazi për qenin e tyre në Canterbury, Kent.
Darren Jones, sekretari kryesor i kryeministrit, i tha BBC Breakfast se njerëzit duhet të regjistrojnë praninë e tyre në Ministrinë e Jashtme për këshillat dhe përditësimet më të fundit të qeverisë.
“Do të ketë mbështetje konsullore në dispozicion të njerëzve, përfshirë edhe në terren, dhe ne kemi dërguar zyrtarë atje për të ndihmuar me kapacitete shtesë në rajon”, shtoi ai.
Por Wilson i tha BBC-së se familja e saj nuk kishte mundur të regjistrohej dhe të merrte përditësime nga qeveria, pasi shërbimi nuk ishte aktualisht i disponueshëm për ata në Oman.
Jamie Welch, nga Londra veriore, është bllokuar në Doha pasi është kthyer nga pushimet dyjavore në Australi.
Fluturimi i tij fillestar lidhës nga Doha për në Heathrow duhej të riorganizohej për shkak të problemeve teknike në aeroplan dhe fluturimi i tij i mëvonshëm u anulua për shkak të krizës në zhvillim e sipër.
“Për momentin na thuhet vetëm të qëndrojmë në hotelet tona, na ofrohen tre vakte shumë bazike në bufe çdo ditë dhe ujë”, tha Welch për BBC-në.
Ai fillimisht kishte kaluar dy ditë në aeroportin e Dohas përpara se të transferohej në një qendër konferencash dhe më pas në një hotel.
Welch, i cili nuk ka pasur qasje në bagazhin e tij që nga e premtja, tha të hënën në mbrëmje se kishte marrë “një email të përgjithshëm nga ambasada” dhe asnjë telefonatë nga linja ajrore për të shpjeguar se çfarë do të ndodhë më pas.
Disa nga ata që arritën të ktheheshin në Mbretërinë e Bashkuar përshkruan përvojat e tyre për BBC News në aeroportin Heathrow.
Jamie Browne, i cili ishte zhvendosur së fundmi në Emiratet e Bashkuara Arabe me familjen e tij të re, tha se kishte parë raketa që po lëshoheshin për të interceptuar bombat iraniane.
“E dinim që duhej të largoheshim atëherë,” tha ai pasi mbërriti me një fluturim të Emirates të martën. “Ka qenë një kohë traumatike. Jam vërtet mirënjohës që jam kthyer.”
Natalie Fleming, e cila u kthye me të njëjtin fluturim, tha se kishte qenë me pushime në Dubai kur një alarm emergjence u aktivizua në telefonin e saj të shtunën.
“Thonte vetëm të shkoje në një vend të sigurt,” kujtoi ajo. “Por nuk të tregon se ku është një vend i sigurt. Çfarë bën? Ne shkuam në dollapin e gardërobës në apartamentin tonë me të gjitha bagazhet tona.”
Futbollisti amator Cam Langford, 21 vjeç nga Bedfordshire, u largua nga Abu Dhabi pa çorape apo bagazhe në një përpjekje për të shmangur fluturimet e anuluara për t’u kthyer në shtëpi në kohë për të shoqëruar nënën e tij drejt altarit në ditën e dasmës së saj këtë fundjavë.
Langford u prit me lot në sy nga nëna e tij Sarah dhe motra Lila në Heathrow të martën, pasi qëndroi i bllokuar në një hotel për pesë netë, kur supozohej të kishte një ndalesë dy-netëshe pas udhëtimit në Tajlandë.
Cila është këshilla e qeverisë?
Ministria e Jashtme ka këshilluar kundër të gjitha udhëtimeve përveç atyre thelbësore., në Emiratet e Bashkuara Arabe, Bahrein, Kuvajt dhe Katar.
Cooper i tha BBC-së të hënën se kishte rreth 300,000 qytetarë britanikë në vendet e Gjirit.
Të martën, sekretari i jashtëm tha se 130,000 shtetas britanikë ishin regjistruar në programin “Regjistro Praninë Tënde”, i cili është i disponueshëm në Bahrein, Izrael, Kuvajt, Palestinë, Katar dhe Emiratet e Bashkuara Arabe.
Ndërsa shumë britanikë mbeten të bllokuar, disa fluturime për në Mbretërinë e Bashkuar kanë operuar nga Dubai.
Disa fluturime të Emirates janë nisur për në aeroportet Heathrow të Londrës, Gatwick dhe Manchester.
Fluturimet nga Katari mbeten të pezulluara për shkak të mbylljes së hapësirës ajrore në rajon.
British Airways anuloi fluturimet e saj të planifikuara për në Londër Heathrow nga Abu Dhabi, Amman, Bahrein, Doha dhe Dubai të hënën.
Kompania ajrore u tha pasagjerëve se siguria ishte “prioriteti i saj kryesor”. Pasagjerët me rezervime në itinerare të caktuara deri më 15 mars po lejohen të ndryshojnë datën për të fluturuar më 29 mars ose para saj.
