Derbi bask do të luhet në finale të Kupës së Spanjës në futboll këtë edicion. Për herë të fundit Real Sociedadi e Athletic Bilbao janë takuar në finale të Kupës së Spanjës plot 110 vite më parë, në vitin 1910.

Në finale të Kupës së Mbretit nuk janë skuadrat e zakonshme, Real Madridi e Barcelona, apo edhe Atletico Madridi e Valencia. Për trofeun e rëndësishëm do të luajnë dy skuadrat që formojnë derbin bask, Real Sociedadi e Athletic Bilbao.

Sociedadi finalen e siguroi të mërkurën, ndërsa të enjten ndeshjen finale e siguroi edhe Bilbao. Athletic Bilbao kishte fituar ndeshjen e parë gjysmëfinale ndaj Granadës me rezultatin 1:0, ndërsa në ndeshjen e kthimit pësoi 2:1 nga Granada. Në finale kaloi falë golit të shënuar si mysafir.

Carlos Fernandez dhe German Sanchez shënuan golat për Granadën. Yuri Berchiche shënoi golin vendimtar për Athletic Bilbaon në minutën e 81-të. Finalja e Kupës së Spanjës luhet më 18 prill.

Barcelona është skuadra më e suksesshme në “Copa del Rey” me 30 kupa të fituara. Athletic Bilbao ka fituar këtë trofe 23 herë, ndërsa Real Madridi 19 herë. Sociedadi e ka fituar vetëm dy herë Kupën.