Qeveria britanike ka prezantuar një konsultim të ri për vendosjen e rregullave më të ashpra ndaj produkteve vape, me synimin për të ulur përdorimin e tyre nga fëmijët dhe të rinjtë.
Sipas propozimeve të reja, paketimet e vape-ve mund të bëhen më të thjeshta dhe pa dizajne shumëngjyrëshe, ndërsa pajisjet mund të kufizohen në ngjyra më neutrale si e zeza, e bardha ose gri. Gjithashtu, po shqyrtohet mundësia që produktet vape të mos shfaqen më në mënyrë të dukshme në dyqane.
Një tjetër ndryshim i mundshëm lidhet me emërtimin e aromave. Qeveria po propozon kufizime ndaj emrave që mund të duken tërheqës për fëmijët, si ato që lidhen me ëmbëlsira, pije të gazuara apo produkte të tjera argëtuese. Në vend të tyre, mund të lejohen emra më të thjeshtë që përshkruajnë aromën, si për shembull “Mollë”.
Autoritetet britanike thonë se qëllimi i këtyre masave është të pengojnë përdorimin e vape-ve nga të miturit, duke ruajtur njëkohësisht rolin e tyre si alternativë për të rriturit që përpiqen të lënë duhanin.
Propozimet janë ende në fazën e konsultimit dhe nuk kanë hyrë në fuqi. Pas përfundimit të procesit, qeveria do të vendosë nëse këto masa do të kthehen në ligj.
