Më 7 gusht të vitit 2016, Majlinda Kelmendi arriti suksesin më të madh të mundshëm në sport.
Në palestrën “Carioca Arena 2” në Rio de Janeiro të Brazilit, xhudistja pejane fitoi medaljen e artë olimpike. Ishte e pandalshme në kategorinë deri 52 kilogramë. Në gjysmëfinale kishte mposhtur japonezen Misato Nakamura, ndërsa në finale italianen Odette Giuffrida, raporton Koha.net.
Me paraqitje në arenën e madhe në Brazil, Majlinda siguroi shkëlqimin olimpik për plot katër vjet. Katër vjet rresht sportistët që dalin të parët në skenën më të madhe njihen si kampion në fuqi olimpik. Respekti për ta është maksimal. Në sportin e xhudos kjo shoqërohet edhe me ndere tjera. Për shembull emri i kampionëve olimpik në uniformat e tyre shkruhet me ngjyrë tjetër.
Për Majlindën dhe kampionët nga Rio 2016, mbretërimi në skenën olimpike megjithatë do të jetë më i gjatë. Për shkak të shtyrjes së Lojërave Olimpike “Tokio 2020”, Majlinda do të jetë kampione olimpike për plot pesë vjet. Në fakt Majlinda vlerësohet pretendente e fuqishme për të mbrojtur medaljen e artë olimpike. Ajo vet dhe trajneri Driton Kuka vazhdimisht përsërisin se synim do të jetë medalja olimpike, pa saktësuar të artën.
Vetëm në dy raste Lojërat Olimpike Verore nuk janë mbajtur çdo katër vjet dhe kampionët olimpik nuk janë ndërruar apo rishpallur pas kësaj periudhe.
Lojërat e para Olimpike moderne janë mbajtur në vitin 1896. Prej atëherë organizohen çdo katër vjet. Lojërat e vitit 1916 nuk u mbajtën për shkak të Luftës së Parë Botërore. Ngjarja u kthye në vitin 1920 dhe vazhdoi prapë çdo katër vjet deri në vitin 1936. Olimpiada e vitit 1940 dhe ajo e vitit 1944 u anuluan për shkak të Luftës së Dytë Botërore. Vazhdoi në Londër në vitin 1948 dhe prej atëherë Lojërat janë mbajtur çdo katër vjet.
Për herë të parë Lojërat Olimpike shtyhen. Në histori kanë qenë tri anulime për shkak të luftërave botërore, ndërsa për shkak të koronavirusit ngjarja më e madhe sportive shtyhet dhe pritet të mbahet në verën e vitit të ardhshëm. “Tokio 2020” është dashur të mbahet në korrik dhe gusht të këtij viti.
Majlinda për herë të tretë pritet të marr pjesë në Lojëra Olimpike. Në “Londra 2012” garoi për Shqipërinë dhe befasisht u ndal në luftën e dytë. Lëshimin e përmirësoi në Rio ku ishte e pandalshme.
Ajo bëri që Kosova në pjesëmarrjen e parë të siguroi shkëlqim, medalje të artë. Fitoi medaljen e vetme të Kosovës në Rio.
Më shumë medalje priten prej sportistëve kosovarë, përkatësisht xhudistëve, në Tokio. Të paktën pesë pritet të marrin pjesë. Prej Majlindës prapë janë pritjet e mëdha, por tani presioni është i shpërndarë te më shumë garues. Kjo mund të jetë rrethanë lehtësuese për Majlindën.
Ka edhe të tjera, raporton Koha.net. Deri verën tjetër ajo pritet të jetë në gjendje më të mirë fizike. Ajo ka pasur telashe me lëndime në vitet e fundit dhe tani do të ketë më tepër kohë për të arritur formën e dëshiruar.
Majlinda ka fituar krejt çka mund të fitohet në xhudo. Por pritjet prej saj janë gjithnjë më të mëdhatë. Njëjtë do të jetë edhe në Tokio vitin tjetër.
“Besoj se tani do të ketë kohë të mjaftueshme që të gjitha gjërat të vijnë në vendin e vet”, ka thënë Majlinda për Koha.net. “Tani ka më shumë kohë dhe është herët. Por synimi dihet”.
