Përfaqësuesit e policëve britanikë kanë kërkuar nga deputetët që të sigurohen maska për t’u mbrojtur nga personat e pandërgjegjshëm që i pështyjnë policët qëllimisht me synim për t’i infektuar me koronavirus.
Kryetari i Shoqatës së Policisë tha para anëtarëve të Komisionit për Punë të Brendshme se disa persona po shfaqin sjellje që po i rrezikojnë policët nga infektimi me koronavirus.
Zyrtari policor, Paul Griffiths, tha se shumica e popullit e përkrah masën e karantinës dhe policinë, por një pakicë po shfaq sjellje ekstreme. Sipas tij, këto sjellje janë të papranueshme.
Thirrja për maska mbrojtëse nga pështyma erdhi pasi më shumë se 300 ish-policë u pajtuan të kthehen në punë për të ofruar ndihmë në luftimin e përhapjes së koronavirusit, shkruan “Sky News”.
Komisionerja e policisë, Cressida Dick, bëri thirrje që të gjithë policët që janë pensionuar në pesë vjetët e fundit të kthehen në detyrë.
Deri më tani, në Britani janë shënuar mbi 51 mijë persona të infektuar me koronavirus dhe më shumë se 5 mijë e 300 të vdekur.