Më 3 maj të vitit 2016 në Kongresin e UEFA-s të mbajtur në Budapest, futbolli i Kosovës më në fund kishte thyer izolimin shumëvjeçar.
Delegacioni i udhëhequr nga presidenti i atëhershëm i FFK-së, legjenda Fadil Vokrri, kishte udhëtuar në Budapest me shpresa të mëdha. E angazhimi shumëvjeçar u konkretizua, kur pas votimit në kongres, 28 anëtarë të UEFA-s votuan pro pranimit të FFK-së si anëtare e UEFA-s.
Një përkrahje të fuqishme në Kongresin në Budapest, Kosova pati nga zyrtari i ligjor i atëhershëm i UEFA-s, Alasdair Bell, që u shpjegoi pjesëmarrësve të Kongresit se fakti se nuk je anëtar i Kombeve të Bashkuara nuk do të thotë se nuk je shtet. Ishte një pengesë që kishte hasur Kosova vazhdimisht, për shkak të nenit në statusin e UEFA-s.
Pranimi në UEFA u prit me emocione të shumta nga delegacioni i Kosovës.
“Katër vjet më parë ëndrra jonë u bë realitet. Kosova përfundimisht u bë anëtarja e 55-të e UEFA-s në Kongresin e Budapestit, më 3 maj, 2016. Kësisoj, kjo datë hyri në analet e historisë së futbollit tonë, duke shënuar thyerjen e izolimit prej 25 vjetësh. Anëtarësimi në familjen evropiane të futbollit e kurorëzoi sakrificën e shumë gjeneratave të futbollit, donatorëve që mbajtën gjallë futbollin dhe punën e guximshme e të palodhshme të drejtuesve të federatës, që nga kryetari i parë pas mëvetësimit, Agim Bytyçi, pastaj Rexhep Abdullahu, Sabri Hashani e që gjithçka u finalizua nën udhëheqjen e legjendës Fadil Vokrri”, ka shkruar presidenti i FFK-së, Agim Ademi të dielën në faqen zyrtare të federatëss.
Presidenti i FFK-së, Agim Ademi, në përcjellje të anëtarëve të Komitetit Ekzekutiv të FFK-së, të sekretarit të përgjithshëm, Eroll Salihu, anëtarëve të administratës dhe drejtuesve të grupit të tifozëve “Dardanët”, të dielën, kanë bërë homazhe në varrin e presidentit të ndjerë Fadil Vokrri.
