Te Llapi janë të vendosur për të siguruar daljen në garat evropiane për edicionin e ardhshëm, synim që duan ta realizojnë gjatë 11 ndeshjeve të mbetura të Superligës së Kosovës, që do të rinisë garat të premten (nesë).
Ndeshja e parë që do ta sinjalizojë rikthimin e kampionatit të Kosovës do të zhvillohet në stadiumin “Zahir Pajaziti” ndërmjet skuadrës së Llapit dhe Dukagjinit. Superliga e Kosovës ka qenë e pezulluar që nga data 13 mars për shkak të koronavirusit, kurse ndeshjet e para pas pandemisë u zhvilluan të martën dhe mërkurën në kuadër të Kupës së Kosovës. Dueli mes Llapit dhe Dukagjinit i takon xhiros së 23-të dhe zhvillohet të premten (sot) prej orës 16:00, kurse trajneri llapjan Tahir Batatina pret që ekipi i tij të rifillojë me fitore, aty ku edhe e la para se të pezullohej kampionati. Në fakt, kjo është ndeshja e vetme e kësaj xhiroje që zhvillohet të premten (sot) derisa ndeshjet e tjera do të luhen të shtunën dhe të dielën. Të gjitha ndeshjet do të zhvillohen pa praninë e tifozëve në tribuna dhe në përputhje me udhëzimet nga institucionet përgjegjëse për të parandaluar përhapjen e koronavirusit. Gjithashtu, skuadrat kanë të drejtën e pesë zëvendësimeve për shkak të orarit të ngjeshur, pasi do të ketë ndeshje çdo tri ditë. Llapi zë pozitën e gjashtë në tabelë me 34 pikë, sa i ka edhe Feronikeli që renditet i pesti. Ndërkohë, Dukagjini është në fund të tabelës, me vetëm dhjetë pikë të tubuara. Skuadrat e Superligës në mesin e muajit të shkuar janë rikthyer në stërvitje të përbashkëta pas pauzës së gjatë. Trajneri i Llapit, Batatina, thotë se gjatë kësaj periudhe është munduar ta përgatitë ekipin në mënyrën më të mirë të mundshme.
“Jemi munduar të përgatitemi sa më mirë për këtë kohë, në mënyrë që ta rikthejmë formën që e kishim në dy xhirot e fundit para pezullimit të kampionatit ku i arkëtuam gjashtë pikë. Ekipi është i kompletuar dhe maksimalisht i motivuar për ndeshjen kundër Dukagjinit, me të cilën edhe zyrtarisht do të rifillojë Superliga. Dukagjinin do ta respektojmë si çdo kundërshtar tjetër me të cilin ballafaqohemi, por synimi ynë është fitorja, për shkak se duam të sigurojmë një vend që dërgon në Evropë për edicionin e ri, që edhe mbetet objektiv i yni deri në fund të kampionatit”, ka insistuar Batatina. “Jemi ekip stabil dhe me potencial. Do të mundohemi të bëjmë sa më pak gabime në xhirot e mbetura në mënyrë që të jemi në hap me tri skuadrat e para në tabelë. Tifozët do të na mungojnë më së shumti për shkak se ‘Legjendat’ janë forca jonë. Por, ne do të luajmë edhe për ata dhe do të japim maksimumin për të marrë fillimisht rezultat pozitiv ndaj Dukagjinit dhe pastaj të arrijmë synimet që i kemi për ndeshjet tjera”.
Për dallim prej Llapit, që është i kompletuar, Dukagjinit do t’i mungojë Ilir Mustafa për shkak të lëndimit. Gjithashtu, edhe te Dukagjini kanë paralajmëruar se në Podujevë nuk do të udhëtojnë me “flamur të bardhë”, por do të synojnë që të kthehen në qytetin e Klinës me pikë të plota.
“Ndaj Llapit do t’i qasemi ndeshjes me seriozitetin më të madh dhe do të japim 100 për qind nga vetja për t’i marrë pikët e plota, ndonëse nuk do të jetë lehtë për shkak se kemi të bëjmë me një kundërshtar të fortë. Mendoj gjithashtu se dy javë nuk janë të mjaftueshme për t’u përgatitur si ekip, por shpresoj që t’ia dalim mban ta përfundojmë kampionatin ashtu siç duhet, pa lëndime”, ka thënë sulmuesi i Dukagjinit, Altin Merlaku.
Të shtunën do të zhvillohen dy ndeshje të tjera, kurse kjo xhiro do të mbyllet me tri ndeshjet që do të zhvillohen të dielën. Ndeshja e fundit e kësaj xhiroje do të zhvillohet në stadiumin “Fadil Vokrri” ndërmjet Prishtinës dhe Ferizajt, të dielën prej orës 18:00. Ndërkohë, duelet e tjera do të startojnë prej orës 16:00.
Superliga – XXIII
E premte
Llapi – Dukagjini (16:00)
(Arbitra: G. Nuza, F. Berisha, B. Selimaj, V. Kastrati)
E shtunë
Feronikeli – Vushtrria (16:00)
(Arbitra: M. Bejtullahu, A. Ejupi, J. Musolli, B. Kasumi)
Drita – Flamurtari (16:00)
(Arbitra: S. Isufi, D. Preniqi, V. Kelmendi, B. Ajeti)
E diel
Gjilani – Trepça ’89 (16:00)
(Arbitra: G. Shala, E. Zeqiri, F. Sekiraqa, A. Halilaj)
Ballkani – Drenica (16:00)
(Arbitra: A. Shala, G. Hyseni, G. Mehmeti, I. Ceroviku)
Prishtina – Ferizaj (18:00)
(Arbitra: D. Çaka, I. Kabashi, F. Abrashi, I. Mehmeti)
1. Ballkani 22 13 5 4 35:15 44
2. Drita 22 13 4 5 37:17 43
3. Gjilani 22 13 2 7 38:20 41
4. Prishtina 22 12 5 5 32:14 41
5. Feronikeli 22 10 4 8 36:25 34
6. Llapi 22 10 4 8 32:34 34
7. Drenica 22 8 6 8 28:29 30
8. Flamurtari 22 8 4 10 29:41 28
9. Trepça ’89 22 7 5 10 31:34 26
10. Ferizaj 22 8 1 13 22:34 25
11. Vushtrria 22 4 4 14 21:48 16
12. Dukagjini 22 2 4 16 11:41 10
