Ambasadori britanik në Shqipëri, një nga aktorët që kanë nxitur fuqishëm arritjen e marrëveshjes për reformën zgjedhore, vlerëson produktin e arritur, duke e cilësuar një hap të rëndësishëm drejt BE-së:
“Kemi qënë mbështetës shumë të mëdhenj të Reformës Zgjedhore, gjatë gjithë procesit të saj. Ky është një hap shumë i rëndësishëm drejt anëtarësimit në BE. Është një hap i rëndësishëm pasi garanton që zgjedhjet e ardhshme të jenë më të mira për vendin. Mund të kemi ndryshime apo reforma të tjera në të ardhmen, por kjo nuk do të thotë se kjo që kemi nuk është e rëndësishme. Këshilli Politik ka ardhur me një përfundim, dhe hapi tjetër është që kjo marrëveshje të shkojë në parlament. Unë shpresoj shumë që parlamenti ta kalojë këtë vendim.”
Marrëveshja politike e arritur një jave më parë, pritet të marrë votën e deputëteve të cilët pritet të miratojnë dy drafte të reformës zgjedhore; një draft që përfshin ndryshimet në kodin elektoral e që do të zbatohet në garën e vitit 2021, dhe një kod i ri zgjedhor që do të hyjë në fuqi në vitin 2025 e do të perfshije elementin e depolitizimit te komisioneve.
“Realiteti është se ka shumë sisteme elektorale në botë dhe patjetër çdo demokraci ka mekanizma të ndryshme që e bëjnë të funksionojë. Dhe nuk do ishte e drejtë nga ana ime t’ju them se cila do ishte forma e duhur për të bërë demokraci në Shqipëri, por ajo që do ishte shumë e rëndësishme është që çfarëdo sistemi të zgjidhet të zbatohet me mënyren e duhur e pa korrupsion. Ajo që duam të shohim në fund të këtij udhëtimi, janë zgjedhje të lira e të drejta”
Marrëveshja politike e cila mori edhe me bekimin e ndërkombëtarëve për Reformën Zgjedhore ka dymbëdhjetë pika që detajojnë mënyrën se si do të ndryshojë procesi. PS dhe PD ranë dakord për identifikimin elektronik të votuesve, për një formule të KQZ, ndërsa komisionet e votimit do të mbeten siç janë me përbërje partiake, deri në zgjedhjet e vitit 2025.
