Gjenocidi serb i regjimit të Millosheviqit ndaj shqiptarëve të Kosovës do të ketë muzeun e vetë i cili do të quhet “Bllaca 99”.
Në shënimin e 20 vjetorit të dëbimit të dhunshëm të mbi 400 mijë qytetarëve shqiptar, autoritetet e Kosovës në bashkëpunim me ITKSH-në, kanë vendosur në Bllacë të Hanit të Elezit, trenin që në vitin 1999 transportonte shqiptarët e Kosovës për në Maqedoni.
“Me sytë tanë kemi parë tmerrin që forcat pushtuese serbe kanë bërë në këtë zonë. Jo vetëm që janë ndarë fëmijët mes vete, por edhe janë hudhur nga ky tren, e si dëshmi kemi edhe trupat e gjetura në lumin Lepenc. Në ditën kur po bëjmë vendosjen e këtij gurthemeli, s’kemi si të mos e kujtojmë përkrahjen e parezervë të bashkëkombasve tanë në Shkup”, tha Rufki Suma, kryetari i Komuinës së Hanit të Elezit.
Kryeministri i Kosovës Ramush Haradinaj falënderoi shqiptarët e Maqedonisë që hapën dyert për bashkëkombësit e tyre. Kryetari i BDI-së, Ali Ahmeti deklaroi se ky monument do të shpërbejë që asnjëherë të mos harrohet e kaluara.
“Ndërkohë që 60 për qind prej tyre janë vendosur në shtëpi të shqiptarëve që i hapën dyert e zemrat deri në lajmin e madh që ushtoj si vetëtima, Kosova u çirua, Kosova mbeti gjallë. Faleminderit shqiptarë, bashkombas kudo që jeni, faleminderit për bukën dhe ujin, për strehën dhe mbi të gjitha për shpresën që ua mbajtët gjallë të përndjekurve me ëndrra të vrara”, pohoi Ramush Haradinaj, kryeministër i Kosovës.
“Ky gjenocid, mori me mijëra e mijëra njerëz që sot akoma plagët janë të hapura me mijëra që nuk dihet se ku kanë varret dhe nuk dihet se çfarë kanë patur ata. Ky tren dhe kjo ngjarje dhe kjo përkujtimore na kujton të gjithë neve që ne të kaluarën të mos e harrojmë sepse nëse harrohet e kaluara, vështir se mund të ndërtojmë të ardhme”, theksoi Ali Ahmeti, kryetar i BDI-së.
Në përkujtimin e gjenocidit, po ashtu u vendos edhe një ekspozitë me fotografi të ngjarjeve të 99-ës, u mbollën 99 fidanë, është botuar libër me 99 poezi nga autor të ndryshëm ndërsa u mbajt edhe manifestim artistik.
