26 janë personat që janë mashtruar, të gjithë me një detaj të përbashkët: emigrant shqiptarë në Angli. “Hackerat” futeshin në llogaritë e tyre sociale dhe u kërkonin shokëve para duke u inskenuar një situatë, në të cilën kishin nevojë për para.
Detaje të reja janë zbardhur nga grupi i mashtruesve, të cilët përdorinin Facebook për të përfituar para përmes mashtrimit. Duke përdorur SKEMA të ndryshme, të udhëzuara nga “koka” e grupit, E. P. grupi ka arritur që të përfitojë jo pak por 38 mijë euro.
26 janë personat që janë mashtruar, të gjithë me një detaj të përbashkët: emigrant shqiptarë në Angli. “Hackerat” futeshin në llogaritë e tyre sociale dhe u kërkonin shokëve para duke u inskenuar një situatë, në të cilën kishin nevojë për para. Shokëve emigrantë u kërkoheshin shuma të vogla që mund të varionin nga 500-1000 paund për arsye shëndetësore, duke grumbulluar në fund shumën e majme. Mesazhi që u dërgohej ishte standard por i formuluar në mënyra të ndryshme.
“Të lutem jam i afërmi yt kam djalin shumë sëmurë, kam kredinë pa paguar, kam një borxh dhe duhet ta kthej, kam lënë disa lekë në bixhoz. Mi nis disa para dhe kur të vish në Shqipëri t’i kthej. Ju luten mos flisni me gruan e familjen time se po e morën vesh ata më koritin (turpërojnë) dhe kam turp,”-shkruhej në mesazh.
Kjo skemë mashtrimi, ka zgjatur për gati 1 vit, dhe të gjithë personat e kontaktuar kanë pranuar që të dërgojnë shumën e kërkuar. Më pas paratë vinin në Shqipëri dhe paratë tërhiqeshin përmes agjencive. Çdo person që arrinte të merrte para nga “preja” e tij, merrte si shpërblim nga “koka” e grupit shumën prej 3-4 mijë lekë.
Si u zbulua grupi i mashtrueëve?
“Më mashtron herën e parë, turp për ty. Më mashtron herën e dytë, turp për mua.” Dhe skema nuk ka funksionuar herën e dytë. Emigrantët kanë filluar të dyshojnë në momentin kur u janë kërkuar sërish para dhe kanë vendosur të komunikojnë drejtpërdrejt me personin që donte hua. Gjatë telefonatës është bërë ballafaqimi se ata kurrë nuk kanë marrë lekë prej tyre duke zbuluar edhe mashtrimin.
Si ishte i përbërë grupi?
9 ishin personat që kishin vendosur të merrnin para nga të tjerët. Në skemën e mashtrimit janë edhe 4 vajza të përfshira. Të gjithë të arrestuarit, të grupmoshës 21-48 vjeç do të njihen nesër me masën e sigurisë në orën 13:30 në dhomën penale Tiranë. Ata u prangosën gjatë operacionit “Transferta”, ndërkohë që në kërkim është edhe një person tjetër. Policia nuk i ka publikuar identitetet e tyre por vetëm inicialet, të cilat janë: E. A., 29 vjeç, I. Q., 27 vjeç, A. M., 48 vjeç, A. T., 28 vjeçe, N. Sh., 21 vjeç, E. H., 33 vjeçe, A. Sh., 21 vjeç, A. A., 38 vjeç, të gjithë banues në Tiranë dhe për shtetasin E. P., 30 vjeç, banues në Tiranë. Të arrestuarit akuzohen për “Mashtrim kompjuterik” dhe “Ndërhyrje në të dhënat kompjuterike”.
