Komisioneri europian, Johanes Hahn shprehet i bindur se në fund të muajit maj Komisioni Europian do të paraqesë një rekomandim pozitiv për Shqipërinë dhe Maqedoninë e Veriut sipas kritereve të miratuara njëzëri nga shtetet anëtare.
“Shtyrja dhe mosnjohja e progresit objektiv të bërë nga vendet kandidate do të ketë pasoja dramatike për këto vende dhe rajonin në tërësi”, theksoi Komisioneri europian, Johanes Hahn në një intervistë të dhënë për Agjencinë Gjermane të Lajmeve (DPA).
Për sa i përket pasojave në rast se rekomandimi pozitiv i Komisionit nuk do të miratohet, Hahn deklaroi se “bëhet fjalë për kredibilitetin e BE-së. Vetë shtetet anëtare vendosën qershorin si afatin për të vendosur hapjen e negociatave me Maqedoninë e Veriut dhe Shqipërinë”.
Ai thekson rritjen e përpjekjeve për të luftuar korrupsionin dhe krimin e organizuar.
“Shqipëria ka bërë progres shumë të mirë në raport me kriteret e pranuara nga shtetet anëtare. Reforma gjithëpërfshirëse në Drejtësi është ekzemplare. Për më tepër, pritshmëritë legjitime të shqiptarëve duhet të vlerësohen nga shtetet e BE-së. Megjithatë, për shembull, përpjekjet për të luftuar korrupsionin dhe krimin e organizuar, në sektorë që shqetësojnë veçanërisht shtetet anëtare, duhet të rriten”, vazhdoi Hahn i pyetur nëse Shqipëria do të marrë sërish rekomandim pozitiv.
“Nëse BE-ja nuk eksporton vazhdimisht stabilitet tek fqinjët tanë të afërt, atëherë do të importojë destabilitet”, tha komisionari europian i pyetur nëse shtetet e BE-së do të respektojnë rekomandimin e Komisionit. Lajmi u perkthye ng ATA.
