Të paktën 40 delfinë kanë ngordhur në Mauritius, pas derdhjes së naftës nga një anije japoneze, zyrtarët dhe dëshmitarët kanë thënë të premten.
Ambientalistët kanë kërkuar hetim për të vërtetuar nëse delfinët kanë ngordhur si rezultat i derdhjes nga anija.
Mund të ketë më shumë delfinë të ngordhur, ka thënë peshkatari Yasfeer Heenaye, derisa shtoi se ka parë rreth 25-30 delfinë të ngordhur që lundronin mbi ujë.
“Ishte një nënë dhe i vogli i saj”, tha ai, transmeton KOHA. “Ai ishte i lodhur, nuk notonte mirë. Por e ëma qëndroi afër tij, nuk e la atë vetëm dhe të shkonte me grupin. Ajo po mundohej ta mbronte atë”.
Ai përshkruan edhe momentin kur delfini ngordhi derisa po rrotullohej rreth anijes dhe po përpëlitej derisa brenda pesë minutash nuk lëvizte më.
Javsin Sok Appadu, zyrtar qeveritar i tha Reutersit se 25 delfinë ishin dërguar për autopsi dhe se rezultatet priteshin brenda ditësh.
Deri më tash, veterinarët kanë ekzaminuar vetëm dy delfinë të cilët kanë treguar shenja të lëndimit por jo të kimikateve nga nafta në trupin e tyre.
