Autoritetet shëndetësore britanike pranuan sot se shkalla e infeksionit në Britaninë e Madhe nuk është nën kontroll, ndërkohë që vala e dytë e COVID-19 vazhdon të përshkallëzohet.
“Gjërat po shkojnë në drejtimin e gabuar”, paralajmëroi Këshilltari Shkencor i qeverisë, Patrick Vallance, në një konferencë shtypi në Downing Street.
“Shkalla e infeksionit vazhdon të rritet dhe nuk është nën kontroll për momentin”, shtoi ai.
Kufizime të reja janë ndërmarrë në javët e fundit, veçanërisht në nivel lokal, për shkak të rritjes së numrit të personave të infektuar.
Vendi i goditur më rëndë në Europë, me 42 143 të vdekur (+71), BM regjistroi 7 108 raste të reja, duke e çuar numrin e përgjithshëm të rasteve pozitive në 453 264.
