Ciro Immobile nuk ka asnjë dyshim që Lazios i është dashur një lojtar si Vedat Muriqi.
Duke folur para ndeshjes në Ligën e Kampionëve kundër Borussia Dortmund, Immobile pati disa fjalë edhe për sulmuesin e Kombëtares së Kosovës, me të cilin në rast se kuptohen mirë dhe janë në formë do të luajë në sulm këtë sezon.
Lazio e nis aventurën në Champions të martën kundër Dormtundit në Grupin F, ndeshja tjetër do të jetë mes Zenit St. Petersburg dhe Club Brugge.
“Vedat Muriqi është një lojtar i zgjuar. Dje u stërvitëm për herë të parë së bashku. Ai ka një stil loje ndryshe nga unë, por ai ka aftësi që mund të zgjidhin shumë nga problemet tona”, u shpreh Immobile.
“Ai është ndryshe nga unë dhe Joaquin Correa. Mund të themi se ka një lojë të ngjashme me Felipe Caicedo. Kosovari më njeh mirë dhe i di lëvizjet e mia në fushë. Vedati do të kontribuojë shumë në këtë ekip”.
Muriqi debutoi me fanellën e Lazios të shtunën në humbjen befasuese 3-0 nga Sampdoria.
Ai u inkuadrua në lojë në minutën e 59’ në vend të Felipe Caicedo, por nuk arriti të ndihmojë ekipin e Simone Inzaghit që po humbiste tashmë 2-0 dhe deri në fund pranuan edhe një tjetër gol për 3-0.