Një ditë para zgjedhjeve presidenciale në Shtetet e Bashkuara, pjesa tjetër e botës po mban frymën për rezultatin e këtyre zgjedhjeve.
Votimet veçse kanë nisur në Shtetet e Bashkuara. Vetëm në Teksas kanë votuar nëntë milionë amerikanë.
Ky shtet është çerdhe e republikanëve të prirë nga Donald Trumpi.
Mirëpo, sondazhet tregojnë se Joe Bideni ka një ngritje të madhe në përkrahje në këtë shtet.
Nëpër Evropë, qeveritë po presin efektin e zgjedhjeve që do të kenë nëpër shtetet e tyre.
Britania në muajt e fundit ka synuar të arrijë marrëveshjen tregtare me SHBA-në pas vendimit që të largohej nga Bashkimi Evropian.
Mirëpo, përplasja për marrëveshjen me Irlandën Veriore, ka shtyrë edhe marrëveshjen me SHBA-në.
Bideni e ka bërë të qartë se nëse nuk ka zgjidhje, nuk do të ketë as marrëveshje tregtare.
Nëpër rrugët e Londrës, shumë njerëz shpresojnë për fitoren e Bidenit, por e pranojnë se situata është e paqartë në duelin mes Trupit dhe rivalit të tij demokrat.
“Kam shpresa se Joe Bideni do të fitojë. E ndjej se Trumpi do të jetë afër, por Bideni do të jetë më i mirë për ekonominë britanike dhe do të na ndihmojë. Nuk mendoj se Trumpi mërzitet për ne”.
“Nëse do të mund t’u thosha diçka amerikanëve është të dalin në votime dhe të mos votojnë Trumpin”.
“Trumpi ka përmirësuar ekonominë amerikane, por mendoj se mendimet e tij janë të dala mode. Joe Bideni është më popullor. Pra, për të mirën e Amerikës dhe krejt botës, Joe Bideni është ai që duhet të fitojë”.
Në Moskë, akuzat për përfshirje në zgjedhjet presidenciale të vitit 2016, vazhdojnë të jehojnë edhe në zgjedhjet e sivjetme.
Hakerët rusë janë akuzuar për ndërhyrje në zgjedhjet amerikane.
Sivjet ka frikë se skenari i njëjtë do të përsëritet.
Mirëpo në Rusi, Trumpi pëlqehet.
“Për ne është më mirë fitorja e Trumpit. Përse? Sepse Bideni është më i ashpër, ndërkaq Putini me Trumpin janë pothuajse të njëjtë. Sa për këtë tonin do të jetë në pushtet përjetë… mirëpo me shumë gjasa Bideni do të fitojë”.
“Bideni është shumë agresiv në politikat e tij për Rusinë. E ka një logjikë dhe e dimë se demokracia së cilës i prin Amerika, nuk e ka dërguar askund. I shohim trazirat dhe mos respektin që u bëhet policëve. Vetë Amerika po proteston ndaj mbrojtjes së vet, po injoron punën e policisë”.
“E dua Trumpin. Sepse është më i kulturuar se kandidati tjetër që është edhe më i moshuar. Trumpi është pak më i ri kështu që bën”.
Donald Trumpi largoi Shtetet e Bashkuara nga marrëveshja klimatike e Parisit në vitin 2017. Që prej këtij viti marrëdhëniet me Francën kanë qenë të tensionuara.
Francezët nuk kanë mendime të mira për presidentin Donald Trump.
“Së pari duhet të dalin të votojnë. Amerikanët duhet të zgjohen nga gjumi dhe të ndalin ndarjen mes të bardhëve dhe të zinjve, mes njerëzve pro-abortit dhe kundër. Është çmenduri. Trumpi është i çmendur plotësisht dhe njerëzit duhet të marrin kontrollin”.
“Do të doja që Joe Bideni t’i fitonte zgjedhjet, sepse është më pak i paparashikueshëm sesa Trumpi. Duhet një president që është më i qartë në marrëdhëniet e tij politike dhe më pak agresiv në çështjet ndërkombëtare siç është marrëveshja e Parisit, të cilën e kundërshtoi Trumpi”.
Në Gjermani, ministrja e Mbrojtjes, Annegret-Kramp-Karrenbauer, aleate e kancelares Angela Merkel, ka thënë se Bashkimi Evropian duhet të arrijë marrëveshje tregtare me Uashingtonin vetëm pas zgjedhjeve të tre nëntorit.
Në Berlin, njerëzit janë shprehur të shqetësuar nëse Trumpi fiton zgjedhjet.
“Shpresoj në fitoren e Bidenit, por frikësohem për fitoren e Trumpit. Nga perspektiva gjermane Bideni është opsion më i mirë, sepse mjaft kemi njerëz të çmendur nëpër botë”.
“Njerëzit duhet të dëgjojnë zemrën e tyre dhe mendoj se është fatkeqësi nëse Trumpi rizgjidhet”.
“Është e papranueshme që dy burra, njëri 78 dhe tjetri 74-vjeçar, e cilësojnë veten fytyra të shtetit. Është koha për diçka të re”.
Vetë SHBA-ja është në udhëkryq: mes vazhdimit të ndasive që ka bërë Trumpi apo rimëkëmbjes së demokracisë me Joe Bidenin demokrat.