Ish-kryeministri në ekzil, në kohën e luftës në Kosovë, Bujar Bukoshi, ka thënë se me akuzat penale ndaj udhëheqësve të Ushtrisë Çlirimtare të Kosovës, po rrezikohet të përmbyset e vërteta dhe panorama e një realiteti historik. Ai ka vlerësuar se ata që synojnë të përfitojnë nga vakumi institucional nga proceset e Hagës janë gabim.
Hashim Thaçi të enjten dha dorëheqje nga posti i presidentit, pas konfirmimit të aktakuzës nga Specialja. Bashkë me të, drejt Hagës udhëtuan edhe kryetari i PDK-së, Kadri Veseli, dhe shefi i Grupit Parlamentar të VV-së, Rexhep Selimi. Ndaj tyre dhe Jakup Krasniqit është ngritur aktakuzë për vrasje, torturë e zhdukje të personave në periudhën mars 1998-shtator 1999. Aty përmenden edhe përkrahës të LDK-së, në mesin e viktimave.
Bukoshi ka deklaruar se pas ngritjes së aktakuzave ndaj krerëve të UÇK-së, Kosovës i duhet të punojë për të bindur botën se problemi i saj ishte Serbia dhe jo shqiptarët.
“Në këto momente të rënda, Kosova duhet të punojë fortë për të bindur botën se problemi i saj ishte Serbia dhe përpjekja e gjenocidit serb mbi shqiptarët dhe jo shqiptarët që, bashkë me rezistencën politike dhjetëvjeçare dhe bashkë me NATO-n, luftuan dhe e shpëtuan Kosovën. Ne do e ruajmë besimin se drejtësia do të triumfojë. Më vjen mirë për guximin me të cilin të akuzuarit po përballen me drejtësinë, me maturinë dhe stoicizmin me këtë të zezë. Kështu, ata do i japin dinjitetin Kosovës dhe të ardhmes së saj”, ka thënë Bukoshi.
“Do ta kenë gabim të gjithë ata që duan të përfitojnë nga vakumi institucional nga proceset e Hagës dhe do të jenë vegla qorre të kompromitimit të rëndë të drejtësisë. Ata do të bëheshin vegla të protagonizmit tribal dhe huqjes së tyre në politikë. Kosova ende nuk e ka përmbyllur betejën e saj me Serbinë naciste dhe këtë sfidë do ta fitojmë, ashtu siç e fituam lirinë dhe pavarësinë. Nuk dua të ndahem nga kjo botë, pa e parë Serbinë të gjunjëzuar, ashtu si Gjermania naciste pas kapitullimit të saj. Ne shqiptarët, nuk do të ligështohemi në këtë furtunë”, ka thënë më tej Bukoshi.
