Konferenca e parë për pranimin e Maqedonisë së Veriut e Shqipërisë duket se nuk do të mbahet nën presidencën gjermane dhe pritet të shtyhet në presidencën e radhës së BE-së, e cila do të drejtohet nga Portugalia e Sllovenia.
Kësisoj për këtë vit gjasat janë që të mos ketë hapje të negociatave. Në konferencën e mbajtur online nga ministri gjerman i Shtetit për Europën Michael Roth bashkë me homologët e tij (portuges e slloven) u diskutua mbi këtë pikë.
“Zgjerimi i BE është një çështje tjetër qendrore e Presidencës Trio. Tre partnerët e BE po punojnë drejt hapjes së konferencave të para për pranimin në BE me Maqedoninë e Veriut dhe Shqipërinë. Edhe këtu, cilido vend që mban Presidencën e Këshillit duhet të angazhohet në negociata të vazhdueshme dhe shpesh komplekse për të bërë përparim, veçanërisht për çështjet që kërkojnë kompromis”, thuhet në deklaratë.
Presidenca gjermane e BE-së do të pasohet nga Portugalia (gjysma e 1-re e 2021) dhe Sllovenia (gjysma e 2-të e vitit 2021).
