“Jemi mbledhur, pra, për ta ridëshmuar plagën tonë të pambyllur, për vrasjen e mbi 13.000 njerëzve tanë, shumica prej të cilëve civilë, gra, pleq e fëmijë”, tha kryetarja e Kuvendit të Kosovës, Vjosa Osmani
Kryeparlamentarja e Kosovës, Vjosa Osmani, njëherësh ushtruese e detyrës së presidentes, në seancën e veçantë të Kuvendit të Kosovës për nderim të viktimave të krimeve të gjenocidit, tha se duhet që edhe njëherë të ngrihet zëri për krimin gjenocidal të kryer nga regjimi serb i Sllobodan Millosheviqit.
Duke iu drejtuar edhe familjarëve të viktimave të këtij krimi të cilët ishin të pranishëm në sallë, Osmani ka përmendur shifrat e të zhdukurve gjatë luftës, duke i konsideruar ata si “të pagjetur të fshehur” nga Serbia.
“Jemi mbledhur, pra, për ta ridëshmuar plagën tonë të pambyllur, për vrasjen e mbi 13.000 njerëzve tanë, shumica prej të cilëve civilë, gra, pleq e fëmijë, mbi 1.600 nga të cilët ende mbajnë statusin e ‘personave të pagjetur’. Por, ata nuk janë thjesht të pagjetur. Ata janë ‘të pagjetur të fshehur’ nga pushteti pasardhës i regjimit që kreu gjenocid mbi ta”, u shpreh Osmani.
Osmani tutje ka shtuar se dhuna mbi viktimat e shkaktuar nga gjenocidi serb është sistematike, nga vrasja e tyre në fshehjen e tyre e në mosdhënie të informative për këto viktima nga Serbia.
“Serbia duhet ta pranojë peshën historike të gjenocidit ndaj shqiptarëve. Ajo duhet të detyrohet që të japë informata për dhunën sistematike ndaj viktimave. Ajo duhet t’u përgjigjet thirrjeve për ofrim të informatave mbi krimet e kryera mbi viktimat dje dhe mbi ta e mbi familjet sot”, u shpreh Osmani, duke shtuar gjithashtu se Kosova do dialog me Serbinë, por vetëm me njohje reciproke.
Përfaqësuesja e shoqatës “Thirrjet e Nënave”, Nysrete Kumnova, tha se familjarët e pikëlluar të viktimave të gjenocidit serb nuk ndaluan që nga lufta në kërkim të fatit të 1.600 të pagjeturve.
Kumnova tha se ata nuk gjetën përkrahje nga institucionet vendore e ndërkombëtare të cilat, sipas saj, do të duhej vetë të merrnin iniciativa për zbardhjen e krimit, kthimin e trupave dhe varrimin e tyre në atdhe.
“Edhe fëmijët tanë ishin shqiptarë, shtetas të Kosovës, të lindur dhe rritur në trojet tona. Të etshëm për liri e atdhe, por ja që Serbia i këputi si lulet dhe ua vyshki jetët e tyre duke i futur thellë në varreza masive”, tha Kumnova, e cila shtoi se sot si asnjëherë më parë është nevoja të hapen dëshmitë për të cilat Serbia nuk kërkoi asnjëherë falje dhe asnjëherë nuk mori përgjegjësi.
Bajram Qerkini nga Shoqata “Zëri i Prindërve”, tha se janë bërë 21 vjet që nuk po mund ta bindin bashkësinë ndërkombëtare që nuk do të ketë bisedime me Serbinë pa e ditur se ku janë të pagjeturit.
“U bënë 21 vjet që nuk po mundemi ta bindim bashkësinë ndërkombëtare apo njerëzit që po na udhëheqin dhe po bisedojnë me Serbinë se më nuk ka bisedime derisa në tavolinë nuk e vendosin letrën (për lokacionin e të pagjeturve) dhe të thonë: ja ku janë”, tha Qerkini.
Në Ditën Ndërkombëtare të Përkujtimit të Viktimave të Gjenocidit, kryeministri Hoti nëpërmjet rrjeteve sociale tha se pret që Serbia të kërkojë falje për krimet dhe gjenocidin e kryer në Kosovë.
Hoti theksoi se “vendi ynë vazhdon të ballafaqohet me plagën e madhe të të zhdukurve”.
“Duke e mbajtur përherë në kujtesë, tragjedinë që ka përjetuar, Republika e Kosovës është e përkushtuar për të ardhmen paqësore të rajonit dhe integrimin në familjen e kombeve të lira demokratike euro-perëndimore. Por, po ashtu, ne presim nga fqinji ynë verior, Serbia, të kërkojë falje për krimet dhe gjenocidin e kryer, të kërkojë falje për djegien e kufomave të civilëve shqiptarë, për varrosjen dhe zhvarrosjen e disahershme të tyre. Përveçse një akt moral, kërkimfalja është edhe kusht elementar human për të ecur përpara kah pajtimi dhe mirëkuptimi në mes dy shteteve tona”, shkroi kryeministri Hoti.
