Një mutacion i virusit i ngjashëm me atë të zbuluar në Britani ka qarkulluar në Itali që nga muaji gusht. Deklarata është bërë nga një virolog britanik. Arnaldo Caruso thotë se varianti i koronavirusit italian është përhapur disa javë para rasteve të para të raportuara nga Britania, madje ai shton se mund të ketë qenë pararendës i mutacionit të zbuluar në Angli.
Shkencëtarët bënë zbulimin teksa analizuan mostrën e tamponit të marrë nga një pacient i cili ka pasur infeksion të vazhdueshëm nga Covid-19. Arnaldo Caruso thotë: Për habinë tonë, kuptuam se kishim identifikuar një variant të ri, të ngjashëm por jo identik me variantin në Britani, i cili kishte filluar të qarkullonte në Itali. Ngjashmëria midis variantit që kemi identifikuar dhe atij anglez na bën të mendojmë se e para mund të ketë gjeneruar mutacionet e tjera që po shfaqen sot në kontinentin tonë.
India u bë sot vendi i fundit që konfirmon raste me mutacionin e ri të virusit. Bëhet fjalë për gjashtë persona të cilët ishin kthyer nga Britania. Ndërsa Gjermania zbuloi se varianti i ri kishte mbërritur që në fund të Nëntorit.
Variant i virusit në Britani thuhet të jetë më infektues dhe se përhapet më lehtë tek fëmijët, duke rritur alarmin e autoriteteve shëndetësore. Megjithatë origjina e mutacionit të virusit në Britani mbetet e paqartë: Besohet të jetë shfaqur që në shtator dhe më pas ketë qarkulluar në nivele shumë të ulëta deri në mes të nëntorit.
Studimet nga një tjetër epidemiolog italian sugjeruan që varianti i gjetur në Brescia mund të ishte gjeneruar rreth fillimit të korrikut. Një nga mutacionet në proteinat dalluese ‘spike’ që përdor virusi për të sulmuar trupin mendohet të jetë i pari i këtij lloji në Evropë.
Shkencëtari nuk tha nëse varianti italian mendohej të ishte më i transmetueshëm, por sugjeroi se mund të kishte qenë një pararendës i llojit më infektues në Britani. Ai thotë se ndryshimi i virusit i kapur në Britani në fakt është raportuar për herë të parë në Brazil, rreth tetë muaj më parë. Një tjetër lloj mutacioni i ngjashëm është gjetur në Afrikën e Jugut dhe gjithashtu ekziston frika se përhapet më lehtë midis të rinjve.
OBSH u ka bërë thirrje vendeve të rrisin përpjekjet për të zbuluar mutacione të tjera të virusit. Fakti që janë zbuluar variante më të hershme të virusit në Europë, lindin dyshimet për shpërthimin e virusit për herë të parë në Kinë, nëse virusi vërtetë ka shpërthyer nga aty.
Ishte data 31 Dhjetor kur zyra e OBSH-së në Kinë u informua për një pneumoni misterioze që kishte sëmurë 44 njerëz në Wuhan. Dy muaj më vonë, Italia u bë qendra e shpërthimit në Evropë ndërsa virusi u përhap veçanërisht në rajonin e Lombardisë.
Origjina e virusit mbetet ende mister. Një ekip shkencëtarësh në bashkëpunim me OBSH kanë shkuar në Wuhan për të nisur kërkimet që parashikohet të zgjasin një muaj.
