Në luftën e Kosovës, Shqipëria hapi dyert për strehim dhe ndihmë, ndërsa 20 vjet më pas të njëjtën gjë e bëri Kosova pas tërmetit të 26 nëntorit, ku mbetën të vdekur mbi 51 persona.
Besa Shahini përjetoi këto dy periudha mortesh që bashkuan shqiptarët. Më 1999 si një e re kosovare, derisa tash si Ministre e Arsimit në Shqipëri.
Por, ajo thotë se nuk u befasua aspak nga gjithë ajo çfarë bënë shqiptarët e Kosovës për Shqipërinë, në ditët e rënda që kaloi pas tërmetit të 26 nëntorit.
“Do të doja të thoja qysh në fillim që nuk më ka befasuar fare solidariteti që e kanë treguar shqiptarët e Kosovës për Shqipërinë, në këto dy javët e fundit kur ndodhi tërmeti dhe gjithë pasojat që solli. Jam shumë mirënjohëse, sepse ka qenë një ndihmë shumë e madhe, sidomos në ditët e para të menaxhimit të krizës. Ndihma që erdhi nga Kosova jo vetëm me grupet emergjente që ishin FSK-ja, që ndihmuan edhe në shpëtimin dhe nxjerrjen e njerëzve nga rrënojat e shtëpive të tyre, por edhe grupet e inxhinierëve që më kanë ndihmuar mua (Ministrinë e Arsimit, Sportit dhe Rinisë), veçanërisht për të adresuar një çështje që e kishim shumë me merak, se a janë shkollat e sigurta për t’u hapur ose jo”, tha ajo.
Ajo shtoi se kanë pasur dy grupe të inxhinierëve nga Kosova që kanë ardhur menjëherë dhe u janë gjendur për t’i ndihmuar. “Ka pas grupe të tjera që kanë ardhur menjëherë dhe janë mobilizuar duke mbledhur ndihma dhe mjete financiare dhe janë gjendur për njerëzit në mënyrë direkte ose duke i kanalizuar ndihmat përmes linjave qeveritare për të dërguar ndihmat aty ku kishte nevojë. Grupet që kanë ardhur nga Kosova dhe që kanë sjellë gjithë ekspertizën e tyre, kanë qenë ndihmë shumë e madhe”, tha ajo.
Shahini ka thënë se bashkimi i shqiptarëve në këtë tragjedi, ka treguar që kufijtë mes Kosovës dhe Shqipërisë janë krejt simbolikë. “Në një mënyrë u nënvizua që këto kufijtë që janë mes Kosovës dhe Shqipërisë janë simbolikë. Kur vjen puna për çështje që janë të rëndësishme, thelbësore për kombin, njerëzit janë një dhe nuk ndalen të mendojnë dy herë ta jap ndihmën ose jo”.
Ajo tha po ashtu se ndonëse është një kufi real që i ndan, Kosova dhe Shqipëria vazhdojnë të frymojnë si një në gjëra të rëndësishme.
“Debati politik mbi të ardhmen e kombit, debati politik si në Kosovë ashtu edhe në Shqipëri, që është më shumë partiak, do të vazhdojë. Në momentin që ndodhi pjesa e emergjencës, filluan zërat e zakonshëm – pozita dhe opozita, Kosova dhe Shqipëria. Kjo nuk e ndryshon faktin që kur vjen puna te gjërat e rëndësishme ne jemi një, funksionojmë dhe frymojmë si një”, tha Shahini.
Ministrja e Arsimit e Shqipërisë në këtë intervistë ka rrëfyer për një telefonatë që i ka bërë Shpend Ahmetit dhe bashkëpunimin me Komunën e Prishtinës për inspektimet inxhinierike të shtëpive dhe objekteve që i kishin rezistuar tërmetit.
“Në ditët e para kur e pashë që Bashkia e Durrësit dhe Krujës, që ishin dy bashkitë më të prekura nga tërmeti, nuk kishin kapacitetet e tyre jo për të parë shtëpitë, por as shkollat që i kishim shumë të rëndësishme të verifikonim nëse janë në rregull ose jo, unë e pata shumë lehtë që ta marrë telefonin dhe ta thërrasë Shpend Ahmetin. Shpend Ahmetit i thashë ‘a mund të vijnë inxhinierët që punojnë në Komunën e Prishtinës’. Ai bëri disa telefonata të tjera edhe u organizua një grup prej 40 personash që kanë ardhur dy herë”, tha ajo.
