Ministri i Drejtësisë, Ulsi Manja ka dhënë disa detaje të rëndësishme mbi marrëveshjen për transferimin e të burgosurve midis Mbretërisë së Bashkuar dhe Shqipërisë. Me anë të një komunikimi për mediat, ministri ka zbuluar 3 pika të rëndësishme të këtij pakti të miratuar nga qeveria shqiptare të mërkurën e 19 korrikut.
Së pari, i burgosuri do të duhet të japë pëlqimin për transferimin e tij. Këtu bëjnë përjashtim vetëm rastet kur drejtësia britanike ka dhënë vendimin për dëbimin e të burgosurit nga vendi.
Nga ana tjetër, pika dytë e kësaj marrëveshjeje, e cila u prezantua nga Manja, ka të bëjë me konvertimin e dënimit, ku pjesë e kësaj do të bëhet edhe Gjykata Shqiptare, duke theksuar se “nuk do ketë shmangie nga dënimi për asnjë person që transformohet nga Britania në Shqipëri”.
Koha e transferimit të të burgosurve do të jetë e ndryshme për secilit, pasi ndikon procesi gjyqësor si edhe kapacitetet që do të ketë në burgjet shqiptare, megjithatë Manja tha se për efekt financiar, në fund ato do të sillen në atdhe me grupe.
“Kjo marrëveshje ka si bazë dhënien e pëlqimit të personave të dënuar, që duan që ta vuajnë pjesën e mbetur të dënimit në Shqipëri, së dyti, në zinxhirin e institucioneve që përfshihen në këtë proces, përveç ministrisë së drejtësie dhe homologeve është edhe Gjykata shqiptare që do bëjë njohjen dhe konvertimit të dënimit sipas legjislacionit shqiptar, nuk do ketë shmangie nga dënimi për asnjë person që transformohet nga Britania në Shqipëri. E treta ka të bëjë se këto të dënuar nuk do vijë përnjëherë, do varet nga kapacitete e lira në burg dhe koha e konvertimit të dënimit. Do vijnë në grup për efekt financiar, dhe më pas do i hapet rruga grupit tjetër. Ka raste kur një i burgosur nuk jep pëlqimin, por këtu përjashtohet në rast se drejtësia britanike ka dhënë vendimin për dëbimin e tij. Në këto raste, autoritete britanike mundet që t’i përcjellin autoriteteve shqiptare edhe pa pëlqimin e të burgosurit”.
Deklarata e Ministrit të Drejtësisë, Ulsi Manja
Nga ana tjetër, siç është raportuar më herët, në bazë të kësaj marrëveshjeje, qeveria e Rishi Sunak do t’i paguajë Shqipërisë të paktën 5 milionë euro në vit për të marrë 200 nga të burgosurit e saj më të rrezikshëm.
