Autoritetet franceze kanë nisur të përdorin taktika të reja për të ndaluar kalimet e paligjshme të emigrantëve përmes Kanalit të La Manshit, duke shpuar me thika gomonet që tentojnë të largohen nga brigjet franceze.
Për herë të parë, policia është futur në ujë për të shkatërruar varkat përpara se emigrantët të hipnin në to.
Masat janë pjesë e një ndryshimi të ri ligjor që pritet të hyjë në fuqi brenda muajit, duke i dhënë policisë së specializuar franceze më shumë kompetenca për të vepruar në ujëra të cekëta. Sipas gazetës “The Times”, kjo strategji synon të frenojë kontrabandën e organizuar dhe valën në rritje të kalimeve ilegale drejt Britanisë.
Presidenti Emmanuel Macron dhe ministri i Brendshëm Bruno Retailleau pritet të diskutojnë këto masa javën e ardhshme në një samit dypalësh me Mbretërinë e Bashkuar. Vizita e Macron në Londër është e para shtetërore nga një president francez në 17 vite.
Ndërkohë, edhe pala britanike po përgatitet për masa më të ashpra. Sekretarja e Brendshme Yvette Cooper ka paraqitur një plan me pesë pika për të ulur ndjeshëm numrin e emigrantëve që mbërrijnë me varka të vogla. Një nga masat e propozuara përfshin largimin nga hotelet i emigrantëve që kapen duke punuar në mënyrë të paligjshme në platforma si Uber Eats apo Deliveroo, vetëm pak ditë pas mbërritjes në Britani.
Qeveria britanike synon gjithashtu të forcojë bashkëpunimin me Francën, të përshpejtojë proceset e azilit dhe të godasë rrjetet kriminale që organizojnë këto kalime të rrezikshme. Vetëm gjatë këtij viti, mbi 43 mijë emigrantë kanë kaluar Kanalin, një rritje prej 47% krahasuar me të njëjtën periudhë të vitit të kaluar.
Zyrtarët britanikë e kanë cilësuar ndërhyrjen franceze si një “moment të rëndësishëm” dhe shpresojnë se marrëveshja e re mes dy vendeve do të shënojë një kthesë në krizën e migracionit. Por pengesa mbeten, mes tyre edhe kundërshtimi i disa shteteve mesdhetare që i druhen një shtimi të presionit mbi kufijtë e tyre si pasojë e marrëveshjes Londër-Paris.
