Gazetari Edison Myrtezai në një lidhje direkte nga Kina ka deklaruar në emisionin Frontal në T7 se është dita e pestë që asnjë person nuk ka rezultuar pozitiv me korona virus në këtë vend.
“Është dita e pestë që nuk ka asnjë të infektuar në Kinë, as në Wuhan. Duket se kjo javë ka nisur e mbarë, duket se kina e ka larguar përfundimisht tmerrin e koronavirusit, këtu pati mijëra viktima dhe mijëra të tjerë të infektuar”, thotë ai.
Myrtezai shton se në Shqipëri dhe në Kosovë janë duke u thyer rregullat e karantinës. Sipas tij, arsyeja se pse Kina ka arritur ta mposhtë virusin janë rregullat e ashpra që i kanë pasur për më shumë se dy muaj.
“E kam parë se të paktën në Shqipëri dhe në Kosovë është thyer ajo pjesa e karantinës, për të blerë gjërat jetike, këtu Kina ka pasur rënie drastike për shkak të masave të rrepta. Edhe mua që jetoj këtu më dukej se ishin më shumë të rënda se që duhet. Ne shqiptarët jemi pak kokëfortë, janë vetëm 14 ditë në karantinë. Duke pasur parasysh sipërfaqen shumë të madhe të Kinës, duheshin të paktën dy muaj, kanë qenë ditët e fundit të dhjetorit, deri nga mesi i muajit shkurt kanë qenë dy muaj që Kina të vinte në fund të koronavirusit, që solli shumë viktima dhe një rënie ekonomike jashtëzakonisht të madhe”, ka deklaruar ai.
