Vendimi i Ministrisë së Industrisë, Ndërmarrësisë dhe Tregtisë në Kosovë për të pezulluar certifikatën e televizionit Klan Kosova ka ngjallur mjaft debate dhe diskutime. I ftuar në emisionin “Në radio” të gazetarit Andri Xhahu, pedagogu i Departamentit të Gazetarisë në Universitetin e Tiranës, Ervin Goci, u shpreh se kjo ngjarje lidhet disi me gjendjen politike në Kosovë. “Besoj ky lloj vendimi tani ka disa konotacione. Më ka bërë përshtypje fushata e tërë mediatike, gati e integruar dhe e koordinuar, për të goditur qeverinë në një moment që unë e konsideroj kyç dhe shumë delikat për sigurinë e Kosovës. Mediet, në vend që të ndjekin parimin e vendeve perëndimore që kur flitet për çështje të sigurisë ato bëhen bllok me shtetin dhe me interesat e kombit, kam parë një skizmë jashtëzakonisht problematike dhe kam bërë pyetjen si ka mundësi që këto media janë vërsulur kaq fort kryetarit të qeverisë, ndërkohë aty ka një çështje midis kryetarit të qeverisë, qeverisë serbe dhe ndërkombëtarëve. Është një çështje përtej konjukturës politike të Prishtinës.”
Sa e cenon ky vendim i qeverisë së Kosovës lirinë e medies, pedagogu shprehet: “Nuk njoh ndonjë autor serioz të thotë se liria e shprehjes duhet të jetë totalisht e pakontrolluar dhe e pamenaxhuar, ku njerëzit të kenë lirinë të shprehin gjithçka. Kjo nuk ka asnjë lidhje me demokracinë. Ne nuk arrijmë dot të kuptojmë që informimi është çështje politike, që ka të bëjë me sigurinë e vendit dhe interesat e shtetit. Në një moment të caktuar kur shteti ka nevojë që mesazhi të jetë i integruar, jo për të bërë propagandë, duhet një lloj solideratiteti i të gjithë hallkave, është funksionalizim i shtuar i medies për të mbrojtur interesat e Kosovës dhe jo të kryetarit të qeverisë. Nuk është mirë që media t’i shkojë nga mbrapa qeverisë por duhet të shikojë interesin shtetëror.”
Ervin Goci vëren se në Kosovë ka një tendencë të disa medieve, që duket se janë të asociuar me aktorë politikë, për të bërë opozitë ndaj qeverisë me një kauzë e cila nuk është për të bërë opozitë. “Sigurisht ata duhet të prodhojnë një alternativë, ka nevojë për kritikë dhe diversitet, por unë shoh që më shumë është një kundërpropagandë, e cila shkon me target për të goditur kryetarin e qeverisë dhe lëvizjen Vetëvendosje.”
Shqetësimi më i madh për pedagogun është se në të tilla situata e pësojnë gazetarët dhe informimi. “Unë nuk e kam problemin te logoja por te intimidimi i publikut, i stafit, i gazetarëve, atyre që merren me infomimin. Por nuk duhet ngatërruar, që një problem i një medieje të jetë i të gjithë tregut të medieve.”
Sipas Gocit, nëse qeveria Kurti do ta ndjekë këtë çështje, kjo duhet bërë në mënyrë sistemike. “Duket bërë një ligj i mirë, duhet ndërtuar një agjenci autonome që jo medoemos të jetë e kontrolluar nga qeveria, por që mbron interesat shtetërore përtej interesave që mund të ketë kryeministri. Nuk jam me qasjen që një media nuk mund të mbyllet kurrë. Për mua një media, e cila ka arritur në atë pikë sa të shkelë çdo lloj shërbimi, funskionalizmi dhe normative ligjore, nuk ka pse ekziston më.”
