Inter është shpallur kampion i Italisë, duke siguruar titullin e 21-të në histori pas fitores së pastër 2-0 ndaj Parmës. Me këtë sukses, zikaltërit e drejtuar nga Cristian Chivu vulosin një sezon dominues, ndërsa Napoli, që ndodhet 12 pikë prapa me pak ndeshje të mbetura, nuk ka më mundësi t’i arrijë.
Chivu, i cili mori drejtimin e skuadrës pas një fundsezoni të vështirë vitin e kaluar, ku Interi humbi titullin në javën e fundit dhe u mund rëndë 5-0 nga Paris Saint-Germain në Ligën e Kampionëve – theksoi filozofinë e tij të punës pas suksesit. “Thjesht përpiqem të jem versioni më i mirë i vetes, për t’i ndihmuar këta djem që ndonjëherë kanë nevojë për karrotën, ndonjëherë për shkopin”, u shpreh ai për DAZN Italia.
“Përpiqem të shfrytëzoj përvojën që kam pasur në shumë dhoma zhveshjeje dhe të mos i përsëris gabimet me të cilat jam përballur si lojtar. Përpiqem të jem empatik, mirëkuptues, të mos mendoj për konsensusin e kritikëve jashtë, por vetëm për atë që mendojnë ata që më duan. Unë jam trajneri, gjithmonë do të jem i hapur për debat dhe në rrezik, kjo është puna”, shtoi ai.
Sezoni i zikaltërve është karakterizuar nga dominim i qartë, me 26 fitore dhe vetëm 5 humbje, duke lënë pas rivalët kryesorë, përfshirë Napolin dhe Milanin, që kanë vuajtur nga mungesa e qëndrueshmërisë. Diferenca në rezultate dhe performancë e ka bërë titullin pothuajse të pashmangshëm për Interin që disa javë përpara fundit.
Tashmë, skuadra e Chivu-së synon edhe një trofe tjetër, pasi do të përballet me Lazion në finalen e kupës më 13 maj, duke pasur mundësinë të mbyllë sezonin me një dopietë dhe të lërë pas zhgënjimet në Superkupë dhe në Ligën e Kampionëve.
