Gjiganti italian, Juventus, ka arritur marrëveshje me prokurorin e Federatës Italiane për pranimin e fajësisë në rastin e pagave, ku zonja e vjetër javë më parë u dënua me -10 pikë, duke i çuar ata nga pozita e dytë në vendin e shtatë. Kjo do të thotë se gjyqi i dytë sportiv do të mbahet nesër më 30 maj dhe jo siç ishte planifikuar më 15 qershor.
Burime të shumta në Itali kanë konfirmuar se drejtorët e Juventusit kanë arritur një marrëveshje me Prokurorin e FIGC-së në një gjyq të dytë sportiv që shqyrton të ashtuquajturën çështje të manovrimit të pagave, marrëdhëniet me agjentët dhe partneritetet me klubet e tjera.
Për rrjedhojë, gjyqi i dytë sportiv që duhej të zhvillohej më 15 qershor do të zhvillohet nesër, e martë, 30 maj 2023.
Siç theksohet nga Gazzetta, kjo do të thotë se Juventus mund të përfundojë me një dënim të reduktuar pikësh për sezonin aktual dhe një gjobë të madhe ose madje të shmangë një zbritje të mëtejshme pikësh për sezonin 2022-23.
Juventusi dhe tifozët e tyre nuk do të presin shumë për të ditur rezultatin e gjyqit të dytë të FIGC, që do të zhvillohet mëngjesin e së martës.
Drejtori i zonjës së vjetër, Francesco Calvo kishte lënë të kuptohet për një marrëveshje të mundshme me FIGC të dielën mbrëma, duke thënë se një dënim i parë prej 10 pikësh i përkiste të shkuarës, duke sugjeruar se klubi nuk do të apelonte.
“Ne e kemi thënë që në fillim shumë qartë se ndjejmë se jemi dënuar padrejtësisht, se ka qenë në disproporcion, se kemi nisur gjyqin të akuzuar për shkelje të një neni, por kemi konstatuar se është dënuar për një tjetër nen. Uji është nën urë tani, kjo është përfundimtare dhe ne jemi të fokusuar në fushë”, tha Calvo përpara ndeshjes Juventus-Milan.
