“U kërkoj të gjithëve, kudo, të kundërshtojnë urrejtjen, të trajtojnë njëri-tjetrin me dinjitet dhe të përdorin çdo mundësi për të përhapur mirësinë”, tha Guterres
Sekretari i Përgjithshëm i OKB-së, Antonio Guterres sot deklaroi se pandemia e koronavirusit të ri (COVID-19) vazhdon të shkaktojë “cunami të urrejtjes dhe ksenofobisë, sakrifikimit dhe frikësimit”, dhe u bëri thirrje të gjithëve të bëjnë përpjekje që t’i japin fund gjuhës së urrejtjes në nivel global, transmeton Anadolu Agency (AA).
“Ndjenjat e drejtuara kundër të huajve janë rritur në mediat sociale dhe në rrugë. Janë përhapur teoritë e konspiracionit dhe antisemitike dhe kanë ndodhur sulme anti-muslimane të lidhura me COVID-19”, tha Guterres.
Ai tha se emigrantët dhe refugjatët “u abuzuan si burim i virusit dhe iu mohua qasja në trajtim mjekësor”.
Guterres u bëri thirrje udhëheqësve politikë të tregojnë solidaritet me të gjithë njerëzit, institucionet arsimore që të përqendrohen në “shkrim-leximin dixhital” në një kohë kur “ekstremistët po përpiqen të gjejnë viktima në një audiencë të kapur dhe potencialisht të dëshpëruar”.
Ai u bëri thirrje mediave, veçanërisht rrjeteve sociale, që “të heqin përmbajtjet raciste, misogjiniste dhe të tjera të dëmshme”, shoqëria civile të forcojë murin për të mbrojtur njerëzit e cenueshëm dhe udhëheqësit fetarë të shërbejnë si shembuj të respektit të ndërsjellë.
“U kërkoj të gjithëve, kudo, të kundërshtojnë urrejtjen, të trajtojnë njëri-tjetrin me dinjitet dhe të përdorin çdo mundësi për të përhapur mirësinë”, tha Guterres.
Kreu i OKB-së theksoi se COVID-19 “nuk i intereson kush jemi, ku jetojmë, në çfarë besojmë ose ndonjë dallim tjetër”.
Apeli global i Guterres për të shmagien e gjuhës së urrejtjes të lidhur me COVID-19 pasoi një mesazh më 23 prill në të cilën pandeminë e koronavirusit e quajti një “krizë njerëzore që po bëhet shpejt një krizë të të drejtave të njeriut”.
Organizata Botërore e Shëndetësisë (OBSH) përhapjen e virusit e shpalli “pandemi globale” më 11 mars. Përveç Evropës, OBSH ka shpallur SHBA-të epiqendrën e re të pandemisë së koronavirusit, e cila u shfaq për herë të parë në fund të vitit të kaluar në qytetin kinez Wuhan.
Më shumë se 269.500 njerëz kanë vdekur nga COVID-19 në të gjithë botën dhe më shumë se 3,845.000 raste të infeksionit me koronavirus janë konfirmuar në të gjithë botën, tregojnë të dhënat nga Universiteti amerikan “Johns Hopkins”. Deri më tani, më shumë se 1.285.000 njerëz janë shëruar.
