Kryetarja e Lëvizjes Socialiste për Integrim, Monika Kryemadhi deklaroi sot se vendimi për të zhvilluar mësimin online rëndon studentët.
Në një konferencë me gazetarët Kryemadhi tha se, “studentët kanë filluar përgatitjet për vitin e ri akademik, qoftë me marrjen e shtëpive me qira, pagimin e tarifave në Universitete e kështu e me radhë”.
“Mbaj mend që me mbylljen e Universiteteve në periudhën e marsit, studentët shqiptarë u detyruan që të transferonin në muajt korrik dhe gusht, pagesat e qirave të shtëpive të tyre, apo dhe të shpenzimeve të tjera të familjeve, duke i nxjerrë jashtë loje të gjitha proceset që ata kishin bërë për periudhën mars-prill-maj”, tha Kryemadhi.
“Shumë familje që kanë fëmijët e tyre studentë kanë kosto shumë të mëdha ekonomike, të cilat janë të ndjeshme menjëherë”, shtoi Kryemadhi.
Për mësimin online, Kryemadhi tha se, “jo të gjitha familjet shqiptare kanë mundësi që të kenë një komunikim nëpërmjet internetit online. Ashtu sikurse nuk po flasim më për standardin dhe cilësinë e mësimdhënies që shkencat juridike, apo sociale, mund ta kenë më komode komunikimin online, por jo Fakulteti i Shkencave të Natyrës dhe Mjekësisë, të cilat kanë bazën kryesore të mësimdhënies laboratorët dhe praktikat”.
E pyetur për akuzat për ndërtimin e shkollës Sami Frashëri, që janë përgënjeshtruar nga kryebashkiaku i Tiranës, Erion Veliaj, Kryemadhi tha se, “unë do t’iu jap një dokument, që në vitin 2017 qeveria shqiptare ka ndërmarrë një vendim që shkollën Sami Frashëri dhe një listë çerdhesh t’ia kalojë Bashkisë së Tiranës”.
“Është një vendim qeverie për inventarizimin e pronave të veçanta, që është bërë dikur në mars të 2017. Dhe pas një periudhe shumë të gjatë vjetore, disavjeçare, në 2020 regjistrohen më 21 prill në Bashkinë e Tiranës. Kjo është kartela e hipotekës, e pronës së shkollës Sami Frashëri, me numër pasurie 6/411. Kjo kartelë është e printuar po me datën 21.04.2020, është e shkruar. Sepse në kuadrin e dixhitalizimit dokumentet dalin edhe me datën që printohet”, u shpreh Kryemadhi.
“Tani çuditërisht më datën 28.10.2020 printojmë përsëri kartelën e shkollës Sami Frashëri dhe na del listë bashkëpronarësh, nuk është më Bashkia Tiranë, por e regjistruar përsëri më 21.04.2020. Unë nuk jam prokurore që ta sqaroj këtë gjë, por këtë mund ta sqarojë shumë mirë Prokuroria. Ditën e martë në orën 4 e gjysëm vendoset një tabelë e tillë me PVC dhe thotë studim, projektim 5 milionë euro me TVSH. Tani unë nuk kam parë tabelë investimi që të thotë studim, projektim 5 milionë euro, kur ndërkohë një shkollë që ka tenderuar në Vorë, në Durrës e ka 3 milionë euro ndërtim, studim, projektim. Ndërkohë që këtë e ka studim projektim 5 milionë euro pa TVSH”, vijoi ajo.
“Problemi tjetër qëndron, ne nuk kemi ndonjë nipt ndërtimi, por ka njerëz të ndershëm sa të duash Partia Socialiste edhe Bashkia e Tiranës, ashtu siç na sollën edhe dokumentet e shkollës Sami Frashëri, që shkolla Sami Frashëri nuk është tenderuar dhe nuk ka të shpallur fitues për tenderin e kësaj shkolle, as për studim projektim. Dhe nga ana tjetër mund t’ju themi që është bërë një fond në kuadrin e rindërtimit që janë 15 shkolla që do të bëheshin me grant nga qeveria shqiptare të marrë nga BE, të paktën kështu e ka deklaruar Kryetari i Bashkisë Erion Veliaj, që edhe kjo shkollë nuk është fare në këtë listë. As në listat e shkollave të BE, mjafton të hyni në linkun e delegacionit të BE”, u shpreh ajo. Dhe ndërkohë, theksoi Kryemadhi, “para një jave dëgjuam kryeministrin që tha nuk kemi marrë asnjë para nga BE në kuadrin e rindërtimit akoma”, tha Kryemadhi.
E pyetur nëse do të presë opozita e bashkuar përgjigjen e Komisionit të Venecias përpara se të shpallë strategjinë e saj sesi do të shkojë në zgjedhjet e ardhshme, Kryemadhi tha se, “çështja e Kodit Zgjedhor apo opinioni i “Venecias” nuk ka të bëjë me votën në kuti, ka të bëjë me kalkulim numër votash, apo me sjelljen, sesi do sillet secili nga ne që do të kërkojë votën në kuti, qoftë për emrin, qoftë për partinë, qoftë për koalicionin”.
“Kështu që strategjia e opozitës, pavarësisht Kodit Zgjedhor që ka miratuar parlamenti ilegjitim, pavarësisht opinionit të Komisionit të Venecias apo deklaratave që mund të ketë për të ndryshuar gjatë rrugës, deri në shkurt-mars, të paktën nga ato që lexojmë, nuk ka të bëjë fare dhe nuk ndikon fare në punën dhe në strategjinë e opozitës për të organizuar jo vetëm strukturat partiake, por edhe opionion publik që në 25 prill të shkojnë drejt kutive të votimit dhe të dënojnë me votë Rilindjen, por jo vetëm Rilindjen”, u shpreh Kryemadhi.
Ajo tha se qytetarët duhet “të vlerësojnë me votë alternativën më të mirë, e cila jam e bindur që është alternativa e opozitës së bashkuar për t’i dhënë Shqipërisë mundësinë dhe krijimin e hapësirave të reja për integrimin europian”.
